रामेछाप । कोरोनाको तेस्रो लहर शुरुभए यता रामेछाप जिल्ला अस्पताल लगाएत विभिन्न स्वास्थ्य संस्थामा कार्यरत २८ जना स्वास्थ्य कर्मीलाई कोरोना संक्रमण पुष्टि भएको छ ।
कोरोना संक्रमित हुने स्वास्थ्यकर्मीमा जिल्ला अस्पताल रामेछापमा ७ जना, प्राथमिक स्वास्थ्य केन्द्र मन्थलीमा ६ जना, गोकुलगंगा अस्पतालमा १ जना र दोरम्वा अस्पतालमा १ जना स्वास्थ्यकर्मीमा कोरोना संक्रमण पुष्टि भएको हो । त्यसैगरी खाँडादेवी स्वास्थ्य केन्द्रमा ८ जना, सुनापति स्वास्थ्य केन्दमा १ जना र उमाकुण्ड स्वास्थ्य केन्द्रमा ४ जना गरि २८ जना स्वास्थ्यकर्मीमा कोरोना संक्रमण पुष्टि भएको जिल्ला स्वास्थ्य कार्यालय रामेछापका प्रमुख जितेन्द्र शाहले जानकारी दिए ।
स्वास्थ्यकर्मी कोरोना संक्रमण पुष्टि भएर आइसोलेसनमा बसेसँगै स्वास्थ्य संस्थामा उपचार सेवा प्रभावित भएको छ । विरामी भएर उपचार लिन स्वास्थ्य संस्थामा गएका नागरिकहरुले समयमा उपचार सेवा पाउन नसकेकोे उमाकुण्ड गाउँपालिका–१ वाम्तीका लक्ष्मी तामाङले जानकारी दिइन ।
उनले भनिन्– स्वास्थ्य संस्थामा उपचार लिन जाँदा स्वास्थ्य संस्थाका सबै कर्मचारीलाई कोरोना पुष्टि भएर आइसोलेसनमा बसेसँगै आफुहरुले स्वास्थ्य सेवा लिन वञ्चित हुनु परेको हो । वाम्तीमा अहिले धेरै नागरिकहरु चिसोका कारण विरामी भएका छन् । सवैले स्वास्थ्य संस्थावाट सेवा पाउन सकेका छैनन् तामाङले बताइन ।
स्वास्थ्यकर्मीमा कोरोना संक्रमण भएपछि जिल्ला अस्पताल लगाएतका स्वास्थ्य संस्थावाट प्रदान गरिने सेवालाई निरन्तरता दिन संक्रमण नभएका स्वास्थ्यकर्मीले दिदै आएको ८ घण्टाको समयसिमा बढाएर दैनिक १२ देखी १६ घण्टासम्म काम गर्ने गरि व्यवस्थापन मिलाएको जिल्ला अस्पताल रामेछापका डा.पबन शाक्यले जानकारी दिए ।
उनले भने– धेरै स्वास्थ्यकर्मीहरु संक्रमित हुनुहुन्छ । संक्रमित भएका स्वास्थ्यकर्मीको पुनः भोली पिसिआर गर्ने गरि व्यवस्थापन मिलाएका छौं । पिसिआर गर्दा संक्रमण नदेखिएका स्वास्थ्यकर्मीलाई काममा फर्काउने र पुनः संक्रमण देखिएका स्वास्थ्यकर्मीलाई आइसोलेसनमा राख्ने छौं । अवरुद्ध स्वास्थ्य सेवालाई निरन्तरता दिने तयारीमा आफुहरु लागि परेको पनि डा.शाक्यले बताए ।
