रामेछाप । जिल्ला स्वास्थ्य कार्यालय रामेछापले ६ महिना देखी ५ वर्ष भित्रका रामेछापका २० हजार ९८ जना बालबालिकाहरुलाई भिटामिन ‘ए’ र जुकाको औषधी खुवाउने कार्यको शुरुवात गरेको छ ।
कार्तिक ७ र ८ गते (आज र भोली) दुई दिनमा जिल्लाभरका ६ महिना देखी ५ वर्ष भित्रका २० हजार ९८ जना बालबालिकालाई भिटामिन ‘ए’ र करिव १६ हजार बालबालिकाहरुलाई जुकाको औषधी खुवाइने खुवाउने कार्य भइरहेको जिल्ला स्वास्थ्य कार्यालय रामेछापका सूचना अधिकारी राजेश प्रसाद पालले जानकारी दिए । उनले भने– जिल्लाको ८ वटा स्थानिय तहका ६४ वटै वडामा रहेका खोप केन्द्र र गाउँघर क्लिनिकवाट सेवा उपलव्ध गराउने गरि आवश्यक खोप र भिटामिन सहित स्वास्थ्यकर्मी खटिसकेको बताए ।
सरकारले बालबालिकामा हुन सक्ने स्वास्थ्य जटिलता तथा कुपोषणको जोखिम न्युनीकरण गर्नका लागि २०५० सालवाट भिटामिन ‘ए’ कार्यक्रम संञ्चालन गर्दै आएको छ । त्यसैगरी बालबालिकाहरुलाई जुकाको औषधी २०५६ सालवाट मात्रै दिइन शुरु गरिएको हो ।
प्रत्येक वर्ष कार्तिक ३ र ४ गते बालबालिकाहरुलाई भिटामिन ‘ए’ र जुकाको औषधी खुवाउने कार्यक्रम संञ्चालन गर्दै आएको थियो । तर यो वर्ष कार्तिकको पहिलो हप्तामा नेपालीहरुको महान चाड दशैंको बिदा परेको कारण चार दिन ढिला गरि यो कार्यक्रम संञ्चालन गरेको हो ।
अहिले पनि देशभर कोरोना संक्रमणको जोखिम कायमै रहेकाले खोप केन्द्रहरुमा जनस्वास्थ्यको मापदण्ड अनिर्वाय रुपमा पालना गरेर बालबालिकाहरुलाई भिटामिन ‘ए’ र जुकाको औषधी खुवाउन स्वास्थ्य मन्त्रालयले देशभरका स्वास्थ्य कार्यालयमा परिपत्र गरेको छ ।
