रामेछाप । सरकारले आगामी वैशाख ३० गते स्थानिय तहको निर्वाचन गर्ने मिति घोषणा गरेसँगै उक्त निर्वाचनका लागि माग गरिएको म्यादी प्रहरी भर्नाको लागि रामेछापका १ हजार ६ सय ७५ जनाले आवेदन पेश गरेका छन् ।
जिल्ला प्रहरी कार्यालय रामेछापले स्थानिय तहको निर्वाचनको लागि रामेछापवाट ७ सय ८४ जना म्यादी प्रहरी माग गरेकोमा उक्त पदको लागि रहर गर्ने नागरिकको संख्या दोब्बर रहेको छ । म्यादी प्रहरीको लागि चैत्र ६ गतेदेखी ११ गतेसम्म आवेदन माग गरिएकोमा १ हजार ३ सय ६ जना पुरुष र ३ सय ६९ जना महिला गरि कुल १ हजार ६ सय ७५ जनाले आवेदन दर्ता गराएको जिल्ला प्रहरी कार्यालय रामेछापका प्रहरी नायव उपरीक्षक राजकुमार थिङले जानकारी दिए ।
म्यादी प्रहरीमा आवेदन पेश गर्नेहरुको छनौट प्रक्रिया चैत्र १३ गते आइतवारवाट शुरु गरिने र चैत्र २२ गतेसम्म अन्तिम नतिजा प्रकाशन गरिसक्ने गरी काम अघि वढाइएको छ । त्यस्तै म्यादी प्रहरीमा उतिर्ण भएकाहरुको लागि चैत्र २८ गतेवाट तालिम शुरु गरिने प्रहरी कार्यालय रामेछापले जनाएको छ । म्यादीमा भर्ना भएका प्रहरीले निर्वाचनमा खटिदा एकमुष्ट ४३ हजार ४ सय ४० रुपैयाँ तलव भत्ता बापतको रकम पाउने छन् ।
