रामेछाप । जिल्ला प्रशासन कार्यालय रामेछापले विना कारण निषेधाज्ञा जारी गरेको छ । आइतबार जिल्ला प्रशासन कार्यालयमा बसेको जिल्ला सुरक्षा समितिको बैठकले रामेछापको प्रशासनिक क्षेत्रमा आइतबार बाट लागु हुने गरी दुई महिना निषेधाज्ञा जारी गरेको छ ।
जिल्ला प्रशासन कार्यालय रामेछापले स्थानीय प्रशासन ऐन (संशोधन सहित), २०२८ को दफा ६ को उपदफा (३. क) बमोजिम राष्ट्रिय वाणिज्य बैङ्क देखि जिल्ला प्रशासन कार्यालय हुँदै कृषि विकास बैङ्क जाने सडक र त्यस सडकको ५० मिटर वरपरको क्षेत्रमा दुई महिना सम्मका लागि निषेधाज्ञा जारी गरेको छ ।
जिल्ला प्रशासन कार्यालयले २०८० माघ १४ गते आइतबार देखि लागु हुने गरी २ (दुई) महिनाका लागि पाँच जना भन्दा बढी व्यक्ति भेला जम्मा भई जुलुस, प्रदर्शन, धर्ना, घेराउ, अनसन, सभा जस्ता आन्दोलन वा विरोधका कार्यक्रम गर्न निषेध गरेको आदेश जारी गरिएको छ । रामेछापका प्रमुख जिल्ला अधिकारी अनिता निरौलाद्वारा आइतबार जारी आदेशमा उल्लेख छ ।
जिल्लाको मुख्य प्रशासनिक केन्द्र तथा मुख्य आगमन मार्गहरूमा भेला, अनसन, धर्ना, घेराउ र विरोध प्रदर्शन जस्ता कार्यक्रमहरू आयोजना गर्दा विभिन्न समूहबिच आपसी विवाद, झैझगडा, मुठभेड एवं भिडन्त भई शान्ति सुरक्षा भङ्ग हुन सक्ने वा हुलदङ्गा वा अशान्ति हुन सक्ने सम्भावना रहेकोले समग्र शान्ति सुरक्षामा प्रत्यक्ष असर पर्नुको साथै सर्वसाधारण नागरिकको सेवा प्रवाहमा असर पर्ने भन्दै निषेधाज्ञा जारी गरेको छ ।
प्रशासनले निषेधाज्ञा जारी गरेको भए पनि मन्थलीमा यति वेला हुल हुज्जत र शान्ति सुरक्षामा खलल पुग्ने खालका घटनाहरू भने केही देखिएका छैनन् । केही दिन अघि ५ दिन सम्म अनसन बसेर हिँडेकी रामेछाप नगरपालिका वडा नं १की बिनु यादवले पुनः अनसन बस्न सक्ने वा उनको सम्भावित आगमनलाई मध्य नजर राखी रामेछाप प्रशासन कार्यालयले उक्त निषेधाज्ञा जारी गरेको हुन सक्ने अनुमान नागरिक हरुले गरेका छन् ।
