मेरो प्रदेश डेक्स
मन्थली, भाद्र ६
रामेछाप सांस्कृतिक कलाकार समाजको १६ औँ वार्षिक साधारण सभा तथा तीज विषेश कार्यक्रम हुने भएको छ । कला, साहित्य र संस्कृतिको संरक्षण र प्रवद्र्धनमा सक्रिय समाजको शनिबार काठमाडौँमा साधारण सभा र तीज विषेश कार्यक्रम हुने भएको हो ।
“रामेछापको शान, कला र संस्कृति हाम्रो पहिचान, समृद्ध रामेछापका लागि हाम्रो अभियान” भन्ने नारासहित काठमाडौँ सामाखुसीस्थित एभरेष्ट फुडल्याण्डमा सभा हुने समाजले जनाएको छ । समाजका अध्यक्ष उत्तम पौडेलले समाजको वार्षिक प्रतिवेदन, भावी योजना र आगामी योजनाहरु प्रस्तुत भएपछि तीज विषेश कार्यक्रम हुने जानकारी दिए । उनले तीजको सांस्कृतिक पक्षलाई जोड दिँदै कार्यक्रममा नाचगान एवं रमाइलो प्रस्तुतिहरु प्रस्तुत हुने बताए । कार्यक्रममा कलाकार, साहित्यकार, एवं कलासाहित्यका पारखीहरुसँगै विभिन्न व्यक्तिव्यक्तित्वहरुको उल्लेख्य सहभागिताको रहने समाजकी वरिष्ठ उपाध्यक्ष सन्ध्या सानुले बताइन् । रामेछापका कलाकारहरुले २०६६ सालमा स्थापना गरेको यो समाजले कलाकारको हकहितका साथै कलासंस्कृतिको संरक्षण र संवद्र्धनका लागि विविध कार्यहरु गर्दै आएको उनले जानकारी दिइन् ।