रामेछाप । महिलाहरूको क्षमता विकास गराउने उद्देश्यले रामेछाप नगरपालिका वडा नं ७ सुकाजोरले ७ दिने उद्घोषण तालिम सञ्चालन गरेको छ । महिलाहरूको बोल्ने कलाको विकास गराउनका साथै व्यक्तित्व कलाको विकास गराउने उद्देश्यले सञ्चालन गरेको तालिममा वडाको २० जना महिलाहरूको सहभागिता रहेको थियो ।
तालिमको उद्घाटन गर्दै रामेछाप नगरपालिकाका उपप्रमुख बाल कुमारी कार्कीले तालिममा सहभागीहरूलाई मनको डर भगाएर राम्रो उद्घोषक बन्न आग्रह गर्नु भएको छ । ७ दिन सम्म सञ्चालन हुने तालीम बाट भरपुर फाइदा उठाउन आग्रह गर्दै महिलाहरूको विकासको लागी आफूले सक्ने सबै प्रकारको सहयोग गर्ने बताउनु भयो । बोल्ने कलाको विकास विना अन्य कलाको विकास सम्भव नहुने भन्दै मन देखी सिक्न समेत आग्रह गर्नु भएको छ ।
कार्यक्रममा बोल्दै रामेछाप नगरपालिकाका प्रवक्ता एवं वडा नं ७ का वडा अध्यक्ष समीर कार्कीले पछिल्लो समय वडाले महिलाहरूलाई सक्रिय बनाउन विभिन्न प्रकारका तालिम तथा कार्यक्रमहरू सञ्चालन गर्दै आएको बताएका छन् । उनले तालिममा सहभागीहरूले तालिम पश्चात् आफ्नो टोल बस्तीमा हुने हरेक कार्यक्रमहरू सञ्चालन गर्नुपर्ने बताए ।
वडा नं ७ का वडा सदस्य रन्जिता कार्कीले वडामा रहेका महिलाहरूलाई सक्रिय बनाउन तालिमको आयोजना गरिएको जनाएको छ । तालिमको सहजिकरण पत्रकार तथा उद्घोषक युवराज श्रेष्ठले गरेका छन् । तालिममा उद्घोषण कला, भाषण कला र नेतृत्व विकास सम्बन्धी विषय वस्तु समेट्न प्रशिक्षक युवराज श्रेष्ठले जानकारी दिए । वडा कार्यालयमा तालिम दैनिक ५ घण्टा सञ्चालन हुने छ ।
