रामेछाप । रामेछाप नगरपालिकाले आइतबार आर्थिक वर्ष २०८१÷८२ को आठ महिना अवधिको विकास निर्माण तथा सार्वजनिक सेवाका विषयमा सार्वजनिक सुनुवाइ कार्यक्रम सम्पन्न गरेको छ । नगरपालिकाको वडा नम्बर ६ को ओख्रेनीमा आइतबार सम्पन्न सार्वजनिक सुनुवाइ कार्यक्रममा चालु आर्थिक वर्ष २०८१÷८२ को आठ महिनामा नगरपालिकाले चालु तर्फ ४४ दशमलव ०९ प्रतिशत र पुँजीगततर्फ १३ दशमलव ४५ प्रतिशत बजेट खर्च गरेको जनाएको छ ।

नगरपालिकाले चालु आर्थिक वर्षको साउन महिना देखि फागुन महिनासम्म जम्मा बजेट ७६ करोड ८८ लाख ६९ हजार ५ सय ५१ रहेकोमा २६ करोड ७ लाख ५५ हजार ६ सय ९४ रुपैयाँ अर्थात् ३३.९१ प्रतिशत रकम खर्च गरेको प्रमुख प्रशासकीय अधिकृत भोला प्रसाद चापागाईँले प्रस्तुत गरेको प्रगति प्रतिवेदनमा उल्लेख गरिएको छ । प्रमुख प्रशासकीय अधिकृत चापागाईँले यो अवधिसम्म चालु तर्फ ५१ करोड ३७ लाख ३ हजार ७ सय २३ रुपैयाँ बजेट रहेकोमा २२ करोड ६४ लाख २३ हजार १ सय ८ रुपैयाँ अर्थात् ४४ दशमलव ०९ प्रतिशत बजेट खर्च भएको बताउनु भयो । पुँजीगत तर्फ २५ करोड ५१ लाख ६५ हजार ८ सय २८ रुपैयाँ बजेट रहेकोमा ३ करोड ४३ लाख ३२ हजार ५ सय ८६ रुपैयाँ अर्थात् १३ दशमलव ४५ प्रतिशत बजेट खर्च भएको प्रमुख प्रशासकीय अधिकृत चापागाईँले बताउनु भयो । यो अवद्यिसम्म नगरपालिका तथा वडाले विभिन्न शीर्षकमा ७० लाख ७८ हजार राजश्व सङ्कलन गरेको जनाएको छ ।

सार्वजनिक सुनुवाइ कार्यक्रममा सहभागी नागरिकहरूले प्रश्न,जिज्ञासा सहित सुझाव सल्लाह दिएका थिए । नागरी कले शिक्षा,स्वास्थ्य,कृषि,सडक,पशुपालन र विकास निर्माणका कामहरूसँग सम्बन्धित प्रश्न गरेका थिए । नागरिकहरूले सोधेको प्रश्नको जवाफ नगरपालिकाका प्रमुख लबश्री न्यौपाने,प्रमुख प्रशासकीय अधिकृत भोला प्रसाद चापागाईँ र सम्बन्धित वडाका वडा अध्यक्षले दिएका थिए ।

सार्वजनिक सुनुवाइ कार्यक्रमकै अवसर पारेर भिडियो एकसरे, महिलाहरूको पाठेघरको क्यान्सर परीक्षण, विभिन्न रोगको परीक्षण र औषधि वितरण, आयुर्वेद चिकित्साबाट बिरामीको उपचार, सामाजिक सुरक्षा अन्तरगतका विभिन्न कार्य, किसानलाई तरकारीको बिउ विजन वितरण, पशु औषधि र सेवा लगायतका नगरपालिकाबाट सम्पादन हुने सार्वजनिक सेवा समेत सञ्चालन गरिएको थियो । सयौँ स्थानीय बासिन्दाले उक्त सुविधा लिएको नगरपालिकाले जनाएको छ ।

कार्यक्रममा नगरप्रमुख लबश्री न्यौपाने, उप प्रमुख बालकुमारी कार्की, प्रमुख प्रशासकीय अधिकृत भोलाप्रसाद चापागाईँ र वडा अध्यक्षहरू र विषयगत शाखाका प्रमुखहरूले सहभागीबाट आएका जिज्ञासाका सम्बन्धमा स्पष्ट पारेका थिए ।

रामेछाप नगरपालिकाले वडा तहखानै पुगेर सार्वजनिक सुनुवाइ गर्ने र सोही दिन घुम्ती शिविरको रूपमा नगरपालिकाबाट सम्पादन हुने सम्पूर्ण सेवा समेत प्रवाह गर्ने गरेको छ । यसअघील्लो सार्वजनिक सुनुवाइ वडा नम्बर ९ मा भएको थियो ।

उक्त कार्यक्रममा पत्रकार महासंघका अध्यक्ष दिपक घिमिरे ,रास्वपाका नेता दुर्गा बहादुर बस्नेत,माओवादी केन्द्रका नेता भिम बहादुर तामाङ्ग,नेकपा एमालेका नगर अध्यक्ष रोशन पाख्रिन र नेपाली कांग्रेसका नगर सचिव सुशिलहरी बख्रेलले नगरपालिकालाई विभिन्न सुझाव सहितको मन्तव्य राख्नुभयो । उहाँहरूले नगरले गर्ने हरेक कामहरू निष्पक्ष र पारदर्शी हुनुपर्ने बताउनुभयो ।

हजुरको रेडियोले सहजीकरण गरेको सार्वजनिक सुनुवाइ कार्यक्रममा रामेछाप नगरपालिका प्रमुख लबश्री न्यौपाने,उपप्रमुख बाल कुमारी कार्की,नगर प्रवक्ता समीर कार्की ,विभिन्न कार्यालयका प्रमुख एवं प्रतिनिधि,विभिन्न राजनीतिक दलका प्रमुख एवं प्रतिनिधि,वडा अध्यक्षहरू,पत्रकार,नगरपालिकाका कर्मचारी,नागरिक लगायतको उपस्थिति रहेको थियो । सार्वजनिक सुनुवाइ कार्यक्रमकै अवसर पारेर स्वास्थ्य,कृषि,पशु,आयुर्वेद र ज्येष्ठ नागरिक परिचय पत्र वितरण जस्ता विविध सेवाहरू सञ्चालन गरिएको थियो ।