रामेछाप : प्रारम्भिक बालविकासका क्षेत्रमा अभिभावकलाई सचेत र जागरुक बनाउने उद्देश्यले रामेछाप नगरपालिकामा ‘अभिभावक सिकाई मेला तथा प्रदर्शनी’ आयोजना हुने भएको छ। रामेछाप नगरपालिका र सेतो गुराँस राष्ट्रिय बालविकास सेवाको संयुक्त आयोजनामा आगामी वैशाख ३१ गते यो कार्यक्रम हुन लागेको हो।
नगरपालिकाले जारी गरेको सूचना अनुसार मेला वैशाख ३१ गते बिहान १० बजेदेखि गौरीशंकर बहुमुखी क्याम्पसको प्राङ्गणमा सञ्चालन हुनेछ। कार्यक्रममा नगरपालिकाभित्रका विभिन्न विद्यालयहरूलाई बालविकास, उचित स्याहार, र शैक्षिक सामग्री प्रदर्शनीका लागि फरक-फरक जिम्मेवारी तोकिएको छ।
मेलामा विद्यार्थी र शिक्षकहरूले बालविकास सम्बन्धी नाटक, दोहोरी गीत, विज्ञान तथा गणित सामग्री प्रदर्शनी, बाल कथा वाचन र सिर्जनात्मक सिपको प्रदर्शन गर्नेछन्। साथै, सांस्कृतिक विविधता झल्काउन लाखेनाच, मारुनी नाच र नेवारी भेषभूषाको प्रदर्शनी समेत गरिने नगरपालिकाका प्रमुख प्रशासकीय अधिकृत भोला प्रसाद चापागाईँले जानकारी दिनुभयो।
नगरपालिकाले विशेषगरी वडा नं. ५, ६, ७, ८ र ९ का विद्यालयहरूलाई अभिभावकहरूको अनिवार्य उपस्थिति गराउन निर्देशन दिएको छ। अन्य सबै विद्यालयहरूले पनि अनिवार्य रूपमा स्टल राखी बालविकाससँग सम्बन्धित सिकाई सामग्री प्रदर्शन गर्नुपर्नेछ।
