रामेछाप .- ‘बालबालिकामा गरिएको लगानी, ल्याउँछ सुनौलो विहानी’ भन्ने मूल नाराका साथ रामेछाप नगरपालिकाका सबै ९ वडाहरूलाई मंगलबार एकैसाथ बालमैत्री वडा घोषणा गरिएको छ।
नेपाल सरकारले सन् २०३० सम्म देशलाई बालमैत्री राष्ट्र बनाउने लक्ष्य लिएको छ। सोही दिशामा रामेछाप नगरपालिकाले कदम चाल्दै, बाल संरक्षण, विकास, सहभागिता लगायतका ५१ वटा सूचकहरू पूरा गरी सबै वडालाई एकैपटक बालमैत्री घोषणा गरेको हो।
नगर प्रमुख लवश्री न्यौपानेका अनुसार, बालमैत्री स्थानीय शासन स्थापनाका लागि सम्पूर्ण वडाहरूले आवश्यक मापदण्डहरू पूरा गरेकाले घोषणा गरिएको हो। वडा नं. ७ सुकाजोरका अध्यक्ष समिर कार्कीले आफ्नो वडालाई सभ्य, सुरक्षित र बालमैत्री बनाउने उद्देश्यले यस्तो निर्णय लिइएको बताए।
वडा नं. ८ का अध्यक्ष सन्तोष तामाङले बालश्रम र बालविवाह अन्त्य, निःशुल्क तथा अनिवार्य शिक्षाको सुनिश्चितता, र सामाजिक रूपान्तरणका लागि बालमैत्री अवधारणालाई व्यवहारमा उतारिएको स्पष्ट पार्नुभयो।
शिक्षा तथा समन्वय इकाई रामेछापका प्रमुख नेत्रप्रसाद गजुरेलले बालमैत्री वडा घोषणाले बालबालिकाको शिक्षा, स्वास्थ्य, सुरक्षा तथा सहभागितालाई सुनिश्चित गर्ने भएकाले मन्थली र रामेछाप नगरपालिकामा यो प्रक्रिया तीव्र गतिमा अघि बढिरहेको जानकारी दिनुभयो।
बाल सञ्जाल रामेछापकी अध्यक्ष कृति तामाङले बालमैत्री वडा घोषणापछि बालबालिकाले आफ्नै योजना छनोट गर्ने अधिकार पाउने भएकाले यस्तो घोषणा आवश्यक रहेको बताइन्।
उक्त घोषणाको अवसरमा संघीय सांसद तथा पूर्व ऊर्जा, जलस्रोत तथा सिंचाइ राज्यमन्त्री पूर्णबहादुर तामाङ (कान्छाराम) ले बालमैत्री घोषणा सराहनीय भए पनि यसको कार्यान्वयनमा कुनै सम्झौता हुन नहुनेमा जोड दिनुभयो।
सो अवसरमा जिल्ला समन्वय प्रमुख चिना खडका, उपप्रमुख प्रेमबहादुर थापा, प्रमुख प्रशासकीय अधिकृत भोला प्रसाद चापागाईं, प्रमुख जिल्ला अधिकारी श्यामकृष्ण थापा, प्रदेश सांसद तारानारायण श्रेष्ठ लगायतले वडा नं. १ देखि ९ सम्म उद्घाटन कार्यक्रमहरूमा सहभागिता जनाएका थिए।
कार्यक्रममा महिला स्वास्थ्य स्वयंसेविका, वालक्लव सञ्जाल, विभिन्न विद्यालयका शिक्षक तथा कर्मचारीहरूलाई सम्मान गरिएको थियो। साथै, विद्यालयका बालबालिकाले सांस्कृतिक कार्यक्रम र चेतनामूलक नाटकमार्फत बाल अधिकारको महत्व दर्शाएका थिए। यसैक्रममा, मन्थली नगरपालिकाका १४ वटै वडालाई पनि बुधबार एकैदिन बालमैत्री वडा घोषणा गर्ने तयारी गरिएको छ।
