रामेछाप । रामेछाप नगरपालिकाले सबै बालबालिकाका लागि निःशुल्क र अनिवार्य शिक्षा लागू हुने घोषणा गरेको छ । शिक्षा क्षेत्रलाई समान पहुँच र आधारभूत अधिकारको रूपमा विकास गर्न नगरपालिकाले यो ऐतिहासिक कदम चालेको हो ।
नगरपालिकाको औपचारिक घोषणा सभा निर्वतमान ऊर्जा, जलस्रोत तथा सिँचाइ राज्य मन्त्री पूर्णबहादुर तामाङ (कान्छाराम) को प्रमुख आतिथ्यमा सम्पन्न भयो । नगरप्रमुख लबश्री न्यौपानेको अध्यक्षतामा आयोजित कार्यक्रममा उपप्रमुख बालाकुमारी कार्की, प्रमुख प्रशासकीय अधिकृत भोला प्रसाद चापागाईं, नगरका जनप्रतिनिधि, राजनीतिक दलका प्रमुख तथा प्रतिनिधिहरू, विद्यालयका प्रधानध्यापक, शिक्षक, कर्मचारी, पत्रकार तथा विभिन्न संघ–संस्थाका प्रमुख तथा प्रतिनिधिहरूको उपस्थिति रहेको थियो ।
कार्यक्रममा बोल्दै मन्त्री तामाङले शिक्षालाई सबैको पहुँचमा पु¥याउने काम राष्ट्रको आधार निर्माण गर्ने काम भएको बताए । नगरप्रमुख न्यौपानेले नीतिगत निर्णय मात्र नभई व्यवहारिक कार्यान्वयनमा नगरपालिका प्रतिबद्ध रहेको स्पष्ट पारिन् ।
तर, राजनीतिक दलका प्रतिनिधिहरूले घोषणाको कार्यान्वयनमा चुनौती रहेको बताएका छन् । उनीहरूले धेरै विद्यालयमा ‘सहयोग’को नाममा शुल्क असुली हुने गम्भीर चिन्ता व्यक्त गर्दै त्यसमा कडाइ गर्नुपर्ने माग गरे । शिक्षा निःशुल्क र सर्वसुलभ बनाउने उद्देश्यप्रति सबैले समर्थन जनाए पनि त्यसलाई प्रभावकारी रूपमा लागू गर्न निगरानी र पारदर्शिता आवश्यक रहेको धारणा व्यक्त गरिएको थियो ।
नगरपालिकाले आगामी दिनमा विद्यालयहरूमा गुणस्तरीय शिक्षा, पहुँच विस्तार र विद्यार्थीमाथिको आर्थिक भार कम गर्ने कामलाई प्राथमिकतामा राख्ने प्रतिबद्धता जनाएको छ । सो अवसरमा नगरपालिकाले अनिर्वाय तथा निशुल्क शिक्षा घोषणा गर्न सहयोग पुर्याएको भन्दै वडा अध्यक्ष वडा शिक्षा समितिका संयोजक बिद्यालयका प्रधानध्यपक लगाएत व्यक्तीहरुलाई सम्मान समेत गरेको छ ।