रामेछाप । रामेछाप नगरपालिका शनिबार बाटऔपचारिक रूपमा बालमैत्री स्थानीय सुशासनयुक्त पालिका घोषणा भएको छ । रामेछापमै आयोजित भव्य समारोहका बीच बागमती प्रदेशका मुख्यमन्त्री इन्द्रबहादुर बानियाँले घोषणा गर्नुभयो ।
मुख्यमन्त्री बानियाँले बाल संरक्षण, विकास, सहभागिता र संस्थागत सुदृढीकरणका ५१ वटा सूचक पूरा गरेपछि रामेछाप नगरपालिका जिल्लाकै दोस्रो र देशभरको २८ औँ बालमैत्री पालिका बन्न सफल भएको जानकारी दिनुभयो । उहाँले भन्नुभयो, “यो घोषणा नगरको ठूलो उपलब्धि हो, यसको दिगोपनाका लागि सबै पक्ष मिलेर अगाडि बढ्न आवश्यक छ । प्रदेश सरकारले यसलाई निरन्तर सहयोग गर्नेछ ।”
त्यससँगै मुख्यमन्त्री बानियाँले बागमती प्रदेश सरकार बालमैत्री स्थानीय शासनलाई कार्यान्वयनमा ल्याउन प्रतिबद्ध रहेको उल्लेख गर्दै प्रदेशभित्रका सबै पालिकालाई बालमैत्री स्थानीय सुशासनयुक्त घोषणा गर्न लागी पर्न आग्रह गर्नुभयो । उनले प्रदेश सरकार त्यसका लागि आवश्यक सहयोग र सहकार्य गर्न सधैँ तयार रहेको पनि स्पष्ट पार्नुभयो ।
नगर प्रमुख लवश्री न्यौपानेले करिब चार वर्षको निरन्तर प्रयासपछि रामेछाप नगरपालिका बालविवाहमुक्त, बालश्रममुक्त र बालमैत्री पालिका बन्न सफल भएको बताए । उनले २०७८ साल फागुनदेखि नीतिगत रूपमा अभियान थालिएको र २०७९ असोजदेखि सघन रूपमा अघि बढाइएको उल्लेख गर्दै भने, “गत जेठ २७ गते नगरपालिकाका सबै ९ वटा वडा बालमैत्री स्थानीय सुशासनयुक्त घोषणा भइसकेका थिए ।”
रामेछाप नगरपालिकामा हाल ७,०८८ घरधुरीसहित ३६,६२१ जनसंख्या छ । जसमा १८ वर्ष मुनिका १०,२४१ बालबालिका रहेका छन् । नगरभित्र ११३ बाल क्लब र १० बाल सञ्जालमार्फत करिब २,०४२ बालबालिका प्रत्यक्ष रूपमा संलग्न छन् । विभिन्न समिती तथा संरचनामा १७० बालबालिकाको सार्थक सहभागिता रहेको नगर प्रमुख न्यौपानेले प्रतिवेदनमार्फत प्रस्तुत गरे ।
घोषणा सभामा पूर्व ऊर्जा, जलस्रोत तथा सिँचाइ राज्यमन्त्री पूर्णबहादुर तामाङ ९कान्छाराम०, प्रदेशका सामाजिक विकास मन्त्री कञ्चनचन्द्र बादे, प्रदेश सांसद तारानारायण श्रेष्ठ लगायतका वक्ताले बालमैत्री पालिका घोषणा ऐतिहासिक उपलब्धि भएको भन्दै यसको दिगोपनामा सबै सरोकारवालाको समान प्रतिबद्धता आवश्यक रहेको उल्लेख गरे ।
सो अवसरमा बालबालिकाले सचेतनामूलक नाटक, कविता वाचन र सांस्कृतिक प्रस्तुति समेत प्रस्तुत गरेका थिए । नगर घोषणा भएसँगै अब बालमैत्री नीति, योजना तथा संरचनाहरूलाई अझ प्रभावकारी रूपमा कार्यान्वयन गरिने अपेक्षा गरिएको छ । यसअघि जिल्लाकै सदरमुकाम मन्थली नगरपालिका बालमैत्री पालिका घोषणा भइसकेको छ ।
