रामेछाप – रामेछाप नगरपालिका यहि भदौ २१ गते शनिबार बालमैत्री स्थानीय शासनयुक्त पालिका घोषणा हुने भएको छ। बाल अधिकारको संरक्षण, प्रबर्धन र सहभागिता सुनिश्चित गर्ने उद्देश्यसहित नगरपालिकालाई बालमैत्री घोषणा गर्न लागिएको नगर उपप्रमुख बाल कुमारी कार्कीले जानकारी दिनुभयो ।
नगरपालिकाका सबै ९ वटै वडा यसअघि नै बालमैत्री वडा घोषणा भइसकेका छन् । वडास्तरमा शिक्षा, स्वास्थ्य, बाल संरक्षण, बाल सहभागिता, खानेपानी, पूर्वाधारलगायत ५१ वटा सूचक पूरा गरेपछि वडा स्तरीय घोषणा सम्पन्न भएको हो । त्यसपछि जिल्ला समन्वय समितिले अनुगमन गरी मापदण्ड पूरा भएको प्रतिवेदन तयार पारेको थियो ।
बालमैत्री स्थानीय शासन घोषणाको प्रक्रिया अन्तर्गत तयार प्रतिवेदनलाई बागमती प्रदेश सरकार समक्ष पठाइएपछि प्रदेश स्तरीय अनुगमन समितिले अनुगमन, मूल्यांकन र अन्तरक्रिया गरेर अनुमोदन गरेको सूचना अधिकारी होम बहादुर थापाले बताउनुभयो । घोषणा कार्यक्रम बागमती प्रदेशका मुख्यमन्त्री इन्द्र बहादुर बानियाँको प्रमुख आतिथ्यतामा हुने तयारी गरिएको छ । नगरपालिकाले बालमैत्री स्थानीय शासन घोषणा भएपछि नगरभित्र बालबालिकामैत्री नीति, योजना र संरचनाहरू थप प्रभावकारी रूपमा कार्यान्वयन हुने अपेक्षा गरिएको छ । यसअघि जिल्लाकै सदरमुकाम मन्थली नगरपालिका पनि बालमैत्री स्थानीय शासनयुक्त पालिका घोषणा भइसकेको छ ।
