रामेछाप । नेपाली काँग्रेस रामेछापको विवाद तल्लो तह सम्म पुगेको छ । केही समय अघि सम्म जिल्लाका नेताहरूमा मात्र देखिएको विवाद बढ्दै कार्यकर्ता तह सम्म विभाजन हुँदै गएको छ ।
४१ औँ वि पी स्मृति दिवसको अवसरमा काँग्रेसका दुई समूहले छुट्टा छुट्टै कार्यक्रम गरेको छ । जिल्ला सभापति पूर्णबहादुर तामाङ कान्छारामको नेतृत्वमा रामेछाप नगरपालिका वडा नम्बर ८ बाविया खर्कमा बृक्षरोपन गरियो भने पूर्व पार्टी सभापति रामचन्द्र खड्काको नेतृत्वमा सुनापती गाउँपालिका वडा नम्बर १ गुन्सीमा बृक्षरोपन कार्यक्रम गरियो । वि पी को स्मृति दिवसमा बिपीको सिद्धान्त र बिचारको कुरा भन्दा दुवै समूहले एक अर्कालाई विरोध गर्ने र गाली गर्ने काममा ४१ औँ वि पी स्मृति दिवस सम्पन्न गरे ।
पार्टी सभापति कान्छारामको नेतृत्वमा भएको कार्यक्रममा खड्का नेतृत्वको समूहले पार्टीको नीति र विधि भन्दा बाहिर आफू मनलाग्दी कार्य गरेको भन्दै खड्का समूहको चर्को आलोचना गरे ।
यता पूर्व पार्टी सभापति रामचन्द्र खड्का नेतृत्वको समूहले पार्टी सभापतिले निर्वाचन जिते सँगै दाइजोमा पार्टी पाएको जसरी एकलौटी निर्णय गर्दै हिँडेको बताए । सभापतिले एकल कम्पनी जसरी पार्टीको नीति विधि विपरीत पार्टी सञ्चालन गरेको भन्दै खड्का पक्षले त्यसको विरोध गरेका छन् । पार्टी सभापति मात्र पार्टी हुन नसक्ने भन्दै पार्टीको विधि विधान अनुसार सबै सँग समन्वय गर्दै अघि बढ्न पर्ने खड्का समूहका नेताहरूले बताउँदै आएका छन् ।
