युबराज श्रेष्ठ
रामेछाप । रामेछाप अस्पतालको अध्यक्षमा रामेछाप नगरपालिका वडा नम्बर ६ का यम कुमार पाख्रिनलाई बागमती प्रदेश स्वास्थ्य मन्त्रालयले मनोनयन गरेको छ । लामो समय सम्म अध्यक्ष विहीन बनेको रामेछाप अस्पतालमा पुनः यम कुमार पाख्रिन अध्यक्ष बनेका छन् ।
अघिल्लो कार्यकाल पुरा नहुँदै राजनीतिक झमेला व्यहोर्न परेका अध्यक्ष पाख्रिनले अध्यक्षमा मनोनयन भए सँगै अघिल्लो कार्यकालमा सुरु गरेको अधुरा कार्य सम्पन्न गर्ने आफ्नो लक्ष्य रहेको बताएका छन् । अघिल्लो कार्यकालमा रामेछाप अस्पताललाई ५० शय्याको अस्पताल बनाउन स्कृत प्राप्त भएको अध्यक्ष पाख्रिनले बताए । अध्यक्ष पाख्रिनले अब पहिलो प्राथमिकता रामेछाप अस्पताललाई ५० शय्याको अस्पताल बनाउने र विशेषज्ञ सहितको सेवा सञ्चालन गर्ने बताए । साथै अध्यक्ष पाख्रिनले रामेछाप लगायत दोलखा, ओखलढुङ्गा, सोलुखुम्बु र सिन्धुलीका नागरिक उपचारको लागी काठमाण्डौं लगायत अन्य सहरमा जान नपर्ने गरी रामेछाप अस्पताललाई व्यवस्थित बनाउने समेत बताएका छन् ।
