रामेछाप । नेपाली काँग्रेसका पूर्व महामन्त्री एवं पूर्व उपप्रधान तथा गृहमन्त्री कृष्णप्रसाद सिटौलाले रामेछापका पार्टी सभापति पूर्णबहादुर तामाङ (कान्छाराम)ला ई ऊर्जा जलस्रोत तथा सिचाई राज्य मन्त्री पदबाट किन बर्खास्त गरियो आफूलाई जानकारी नभएको बताउनु भएको छ । रामेछापको जिल्ला सदरमुकाम मन्थलीमा कार्यकर्ता भेटघाटको क्रममा पार्टी भित्र यस विषयमा कुनै छलफल नभएकोले आफू केही बोल्न नमिल्ने बताउनु भयो ।
पार्टी सभापति शेरबहादुर देउवा त्यस समयमा नेपाल बाहिर भएको कारण प्रधानमन्त्रीले बर्खास्त गरेको हो या पार्टीले फिर्ता बोलाएको आफूलाई कुनै पनि जानकारी नभएको र पार्टी भित्र आधिकारिक कुनैपनी प्रकारको छलफल नभएको कारण आफू केही नबोल्दा ठिक हुने नेता सिटौलाले बताउनु भयो । जे कारण मन्त्री पद बाट हटाएको भए पनि पार्टीले यस विषयमा आवश्यक छलफल गरेर समाधान गर्ने बताउनु भयो ।
साथै कार्यकर्ताहरू सँग भेटघाटका क्रममा नेता सिटौलाले पार्टी सदस्यताको नवीकरण र वितरणको लागि पार्टीमा सामूहिक प्रयास हुनुपर्नेमा जोड दिनु भएको छ । पदमा रहेकाले मात्र सदस्यता वितरण गर्ने भन्दा पनि सामूहिक प्रयासबाट सो काम हुनु पर्ने बताउनु भएको हो । क्रियाशील नटुङ्ग्याएर नयाँ सदस्यता वितरण गर्दा भोलीका दिन समस्या हुने भएकाले त्यस कार्यमा ध्यान दिन कार्यकर्ताहरूलाई आग्रह समेत गर्नु भएको छ ।
माओवादी केन्द्रका अध्यक्ष प्रचण्डले पटक पटक धोका दिएकाले प्रमुख राजनीतिक शक्ति एमाले सँग वर्तमान सरकार बनाउन गठबन्धन गरेको उल्लेख गर्दै नेता सिटौलाले काँग्रेसका कारण अहिलेको गठबन्धन सरकारमा कुनै समस्या नहुने बताउनु भयो ।
