काठमाडौँ – राज्य व्यवस्था तथा सुशासन समितिका सभापति रामहरि खतिवडाले राजीनामा दिएपछि नेपाली कांग्रेसले नयाँ सभापति चयनका लागि अनौपचारिक छलफल सुरु गरेको छ।
संघीय निजामति विधेयकमा रहेको कुलिङ अफ पिरियड व्यवस्थामा हेरफेर भएको विषयमा समितिले खतिवडालाई नैतिक जिम्मेवारी लिनुपर्ने ठहर गरेपछि उनले पद त्यागेका हुन्।
राज्यमन्त्री सरहको सेवा–सुविधा प्राप्त हुने यो पदमा कांग्रेसले समितिमै रहेका आफ्ना सांसदमध्येबाट सभापति बनाउने तयारी गरेको छ। समितिमा कांग्रेसका ९ सांसद छन्। उपसभापति पूर्णबहादुर खड्का, महामन्त्रीद्वय गगन थापा र विश्वप्रकाश शर्मा पनि सदस्य भए पनि शीर्ष तहका नेताहरूको रुचि नदेखिएको कांग्रेस स्रोतले जनाएको छ।
सभापतिमा दिलेन्द्र बडू, सरिता प्रसाईं, हृदयराम थानी र अम्बिका बस्नेतमध्ये एक जनालाई पठाउनेबारे छलफल भइरहेको छ। संसदीय सुनुवाइ समितिको सभापति रहेका ईश्वरी न्यौपाने फरक समितिको जिम्मेवारीमा भएकाले सम्भावित उम्मेदवारको सूचीमा छैनन्।
कांग्रेस नेताहरूका अनुसार दोस्रो तहका नेताबाटै समितिको नेतृत्व दिने तयारी छ, जसका लागि छिट्टै औपचारिक निर्णय हुने अपेक्षा गरिएको छ।
