काठमाडौँको सुरक्षा व्यवस्थालाई मजबुत बनाउन जिल्ला प्रहरी परिसरले शनिबार रातभर विशेष ‘सर्च एन्ड स्वीप’ अप्रेशन चलाएको छ। गुण्डागर्दी, ठगी र बिचौलिया धन्दामा संलग्न रहेको आरोपमा प्रहरीले राजधानीका विभिन्न स्थानबाट एकै रात १९५ जनालाई नियन्त्रणमा लिएको हो।
परिसरका एसएसपी रमेश थापाका अनुसार विशेष गरी त्रिभुवन अन्तर्राष्ट्रिय विमानस्थल, पर्यटकीय क्षेत्र ठमेल र बुढानीलकण्ठ लगायतका संवेदनशील क्षेत्रहरूमा प्रहरीले कडा निगरानीका साथ छापा मारेको थियो। विमानस्थलमा यात्रुहरूलाई अनावश्यक दुःख दिने र तानातान गर्ने बिचौलियाहरू, सहरमा हुलहुज्जत गर्ने गुण्डाहरू र ठगी गर्ने गिरोहलाई प्रहरीले निशाना बनाएको हो।
“राजधानीको शान्ति सुरक्षामा खलल पुऱ्याउने र नागरिकलाई सास्ती दिने गतिविधि रोक्न हामीले यो कडा कदम चालेका हौँ,” एसएसपी थापाले भन्नुभयो। पक्राउ परेका सबैलाई अहिले हिरासतमा राखी उनीहरूको विगतको रेकर्ड र वर्तमान संलग्नताबारे गहिरो अनुसन्धान भइरहेको प्रहरीले जनाएको छ।
