काठमाडौँ । नेपाल पत्रकार महासङ्घको केन्द्रीय कार्यालय सञ्चार ग्राममा केन्द्रीय सदस्यहरूले तालाबन्दी गरेका छन् । आगामी जेठ २६ गते निर्वाचन घोषणा गरेको तर सदस्यता शुद्धीकरण लगायतका बारेमा केन्द्रीय समितिमा छलफल नभएको एकलौटी ढङ्गबाट अध्यक्ष, महासचिव, पदाधिकारीहरूले काम गरेको भन्दै तालाबन्दी गरेका हुन्
केन्द्रीय सदस्यहरूले पत्रकार महासङ्घको सदस्यता विधान बमोजिम सङ्गठन समिति र केन्द्रीय समिति मार्फत पास गरेर मात्र सर्वजनीन गर, स्वघोषित कार्यदलले तयार पारेको सूचि खारेज गर लगायतका माग राख्दै नेपाल पत्रकार महासङ्घका अध्यक्ष, महासचिव, पदाधिकारीहरू र निर्वाचन समितिको कार्यकक्षमा तालाबन्दी गरेका हुन् ।
विधान मिचेर अध्यक्ष, महासचिवसहितका पदाधिकारीले केन्द्रीय समिति, सङ्गठन समिति र शुद्धीकरण कार्यदललाई समेत छलेर चोर बाटोबाट सदस्यहरूको सूचीलाई अन्तिम रूप दिन खोजेको भन्दै केन्द्रीय सदस्य रमेश खतिवडाले पहिलो चरणमा तालाबन्दी गरेको बताए।
सक्रिय पत्रकारलाई नवीकरण सूचीबाट हटाउने र चोर बाटोको नामावली सूची नस्विकार्ने बताउँदै केन्द्रीय समिति भित्रैका सदस्यहरूले सुरु गरेको सो सङ्घर्षलाई कमजोर नठान्न उनीहरूले माग गरेका छन्।
महासङ्घको विधानमा केन्द्रीय, प्रदेश, जिल्ला, प्रतिष्ठान र एसोसिएटका सदस्य तथा पदाधिकारीको निर्वाचन हुनुभन्दा ६ महिनाअघि सदस्यताको टुङ्गो लगाउनु पर्छ।
