काठमाण्डौं , कृषि तथा पशुपन्छी विकास मन्त्री पद्माकुमारी अर्यालले कालीमाटी फलफूल तथा तरकारी बजारको अनुगमन गरेको छ । तरकारी बजारमा अनुगमन गर्न मंगलबार कालिमाटी पुगेकी कृषि तथा पशुपन्छी विकास मन्त्री पद्माकुमारी अर्यालले किसानको पसिनाको उचित मूल्य उपलब्ध गराउने आश्वासन दिएकी छिन् ।
अनुगमनका क्रममा मन्त्री अर्यालले तरकारी, माछा स्टलको भाडा मूल्य लगायतका विषयमा जानकारी लिएकी थिइन् । मन्त्री अर्यालले मन्त्रालयले किसान र बजारलाई प्रत्यक्ष जोड्ने विधि बनाउने बताउँदै किसानको पसिनाको उचित मूल्य उपलब्ध गराउने आश्वासन दिएकी छिन् । बजार र किसानलाई प्रत्यक्ष जोड्ने विधिको निम्ति मन्त्रालयले सोच बनाइसकेको मन्त्री अर्यालले बताइन् ।
उत्पादित वस्तुको बजारीकरणको व्यवस्था गर्नु आवश्यकता भएको भन्दै किसानलाई बजारको व्यवस्थापन गर्न उत्पादित वस्तुको बजारको ग्यारेन्टी सरकारले गर्ने बताइन् । मन्त्री अर्यालले बजारको स्टल र सरसफाईको कार्यलाई व्यवस्थित गर्ने कार्यतालिका सहित फागुन १ गते मन्त्रालयमा उपस्थित हुन कालीमाटी फलफूल तथा तरकारी बजार विकास समितिका कर्मचारीलाई निर्देशन दिएकी छिन ।
व्यवसायीहरुले भने विगतमा पनि कृषि तथा पशुपन्छी विकास मन्त्रीहरुले तरकारी बजारको अनुगमन गर्नेे तर काम नगर्ने गरेको गुनासो गरेका छन् । मन्त्रीहरु आउने स्टल व्यवस्थापन देखि फोहोर व्यवस्थापनसम्मको कुरा गर्ने तर काम नगर्ने गरेको व्यवसायीहरुले बताए ।
