रामेछाप । जिल्ला सदरमुकाम समेत रहेको मन्थली नगरपालिका वडा नम्बर १ हाटे चौरमा निर्माण भएको तीनलाल पार्क बिहीबार उद्घाटन भएको छ । पर्यटन पर्बद्धन गर्ने लक्ष्य सहित नगरपालिकाले गौरवको आयोजनाको रूपमा निर्माण गरेको पार्कको बिहीबार औपचारिक उद्घाटन भएको हो ।
समय भन्दा धेरै ढिलो गरी निर्माण सम्पन्न गरेको तीनलाल पार्क बिहीबार निर्माण कम्पनी पाँच पोखरी सुवेदी जेभिले मन्थली नगरपालिकालाई हस्तान्तरण गरेको हो । निर्माण कम्पनी पाँच पोखरी सुवेदी जेभिका सुजन कार्कीले नगर प्रमुख श्रेष्ठ र प्रमुख प्रशासकीय अधिकृत हरि चापागाईँलाई पार्कको साँचो हस्तान्तरण गरेको हो ।
पार्कको उद्घाटन गर्दे नगरप्रमुख श्रेष्ठले नव निर्मित पार्क मन्थली नगरको गौरवको आयोजनका रूपमा रहकोले यसको सञ्चालन व्यवस्थित रूपमा गर्नुपर्ने चुनौती नगर सँग रहेको बताएका छन् । श्रेष्ठले उक्त पार्क मन्थली नगरपालिकाले व्यावसायिक प्रयोजनमा लगाउने समेत जानकारी गराए । श्रेष्ठले भने पार्क सञ्चालन र व्यवस्थापनका लागी लागि नगरले टेन्डर आह्वान गर्ने र जसले टेन्डर प्राप्त गर्दछ सोही कम्पनीले पार्कको रेखदेख गर्ने छ ।
आफू सामाजिक अभियान मार्फत राजनीतिमा जोडिएकोले नगरको विकासका लागि आफू ईमान्दार सिपाहीका रूपमा लागि परेको समेत बताएका छन् । पूर्व जन प्रतिनिधि र समाजका अन्य पक्षको पनि रचनात्मक र सकारात्मक सहयोगको अपेक्षा आफूले लिएको समेत बताए ।
नेपाली साहित्यका प्रथम सहिद सुब्बा कृष्णलाल अधिकारी, प्रजातान्त्रिक आन्दोलनका सहिद गङ्गालाल र नेपाल कम्युनिस्ट पार्टीका संस्थापक महासचिव पुष्पलाल श्रेष्ठको नाम बाट पार्कको नाम तीनलाल पार्क राखिएको छ ।
सदरमुकाम मन्थलीमा १७ रोपनी जमिनमा फैलिएको सो पार्कमा दुई तले प्रशासनिक भवन, ४ सय ८ जना क्षमताको सभा हल, महिला,पुरुष बच्चा सहितको तीन वटा स्विमिङ पुल, ७५ देखि १ सय जना क्षमताको चेन्जिङ्ग रुम तथा स्नान कक्ष समेत पार्क भित्र रहेको छ । पार्कमा क्याफ्टेरिया भवन चमेना गृह, टिकट घर तथा शौचालय र बगैँचा समेत रहेको छ
पार्क निर्माणको लागि १० करोड रुपैयाँ बजेट स्वीकृत भएको थियो । तर पाँच पोखरी सुवेदी जे भी चाबहिलले ६ करोड ८८ लाख २२ हजार ३ सय ७ रुपैयाँमा कार्य सम्पन्न गर्ने गरी ठेक्का सम्झौता गरेको थियो । खासै घुमफिर गर्ने पर्याप्त ठाउँ नभएको रामेछापको सदरमुकाम मन्थलीमा बनेको तीनलाल पार्क एउटा राम्रो घुम्ने थलो बन्ने स्थानीयको भनाइ रहेको छ ।
