रामेछाप । यहीँ बैशाख ३० गते हुने स्थानिय तहको निर्वाचनलाई लक्षित गर्दै दर्ता गराएर व्यक्तिले राखेको हातहतियार बुझाउन जिल्ला प्रशासन कार्यालय रामेछापले निकालेको सूचनालाई नागरिकले बेवास्था गरेका छन् ।
प्रशासन कार्यालयले एक महिना अघि नै एक सुचना प्रकाशन गर्दै निर्वाचनलाई भरपर्दो र विश्वसनिय सुरक्षा व्यवस्थापन गरी भयरहित वातावरणमा निर्वाचन गराउने उद्धेश्यले लाइसेन्स प्राप्त (दर्ता भएका) हातहतियार र अन्य दर्ता विनाका हतियारहरु चैत्र ११ गतेदेखी चैत्र २५ गतेभित्र नजिकको प्रहरी चौकी, जिल्ला प्रहरी कार्यालय वा जिल्ला प्रशासन कार्यालयमा बुझाउन सूचना सार्वजनिक गरेको थियो ।
जिल्ला प्रशासन कार्यालयको रेकर्ड अनुसार रामेछाप जिल्लामा हालसम्म विभिन्न वित्तिय संस्थाहरुमा २४ वटा र व्यक्तिको नाममा रहेका १४ वटा गरी ३८ वटा हतियार दर्ता भएका छन् । सरकारी मापदण्ड अनुसार दर्ता गराएर लिएका धेरै वित्तिय संस्थाले हतियार नविकरण समेत गरेका छैनन् । नविकरण नगरेका ती हतियारहरु अहिले कहाँ छन्, भन्ने बिषयमा स्थानिय प्रशासन नै अनविज्ञ रहेको छ ।
प्रशासनले निकालेको सूचनाको समयावधि सकिएको छ । प्रशासनले गरेको निर्देशनलाई पालना नगरी हातहतियार राखेको भेटिएमा हतियार राख्ने व्यक्तिलाई कानुन अनुसारको हदैसम्मको कारवाही गरिने प्रशासनले जनाएता पनि कसैले पनि हतियार बुझाउन नआएको जिल्ला प्रहरी कार्यालय रामेछापका प्रवक्ता श्रीशंकर श्रेष्ठले जानकारी दिए । उनले भने– एक महिना अघि प्रशासनले जारी गरेको सूचना जिल्ला प्रहरी माताहतका सवै प्रहरी चौकीसम्म प्रवाह गरेता पनि अहिलेसम्म कुनै पनि हतियार बुझाउन ल्याएका छैनन् ।
