काठमाडौँ । नेपाल र भियतनामबीच कूटनीतिक सम्बन्ध स्थापना भएको ५० औँ वार्षिकोत्सवको अवसरमा भियतनामकी उपराष्ट्रपति भो थि आन सुआन तीन दिने औपचारिक भ्रमणका लागि नेपाल आइपुग्नुभएको छ।
उपराष्ट्रपति रामसहायप्रसाद यादवको निमन्त्रणामा नेपाल भ्रमणमा आएकी सुआनलाई आज त्रिभुवन अन्तर्राष्ट्रिय विमानस्थलको अति विशिष्ट कक्षमा परराष्ट्रमन्त्री डा. आरजु राणा देउवा र संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले स्वागत गर्नुभयो।
सोल्टी होटलमा परराष्ट्रमन्त्री राणा र उपराष्ट्रपति सुआनबीच शिष्टाचार भेटवार्ता भएको छ। भियतनामतर्फबाट नेपालमा भएको यो पहिलो उच्चस्तरीय भ्रमणका क्रममा भदौ ८ गते काठमाडौँमा उपराष्ट्रपति यादव र उपराष्ट्रपति सुआनबीच प्रतिनिधिमण्डलस्तरीय वार्ता हुने तय भएको छ।
भ्रमणकालीन कार्यक्रमअनुसार उपराष्ट्रपति सुआनले राष्ट्रपति रामचन्द्र पौडेल र प्रधानमन्त्री केपी शर्मा ओलीसँग पनि छुट्टाछुट्टै भेटवार्ता गर्नेछिन्। नेपाल–भियतनाम सम्बन्धलाई नयाँ उचाइमा पुर्याउने उद्देश्यले यो भ्रमणलाई विशेष महत्वका साथ हेरिएको छ। उपराष्ट्रपति सुआन भदौ ९ गते नेपाल भ्रमण सम्पन्न गरी स्वदेश फर्कने कार्यक्रम छ।
