रामेछाप । पछिल्लो समय रामेछापमा पिसिआर टेष्ट घटाएसँगै जिल्ला अस्पताल देखी पालिका स्तरमा निमार्ण गरिएका आइसोलेसन र क्वारेन्टिन बेडहरु धमाधम खाली हुँदै गएका छन् । कोरोना परिक्षण गराउने संख्यामा गिरावट आएसँगै कोरोना संक्रमण पुष्टि भएका विरामीहरु भेटिन छाडेका हुन् । जिल्ला स्वास्थ्य कार्यालयले गर्दै आएको पिसिआर टेष्ट अहिले बन्द गरेको छ । परिक्षण वन्द भएसँगै कोरोना संक्रमितको संख्यामा कमी आएको हो । कार्यालयले यसअघि पिसिआर टेष्ट गर्दै आएकोमा अहिले सो कार्य बन्द गरिएको जिल्ला स्वास्थ्य कार्यालय रामेछापका प्रमुख जितेन्द्रकुमार कर्णले जानकारी दिए ।
उनले भने– हामीले केही समय देखी पिसिआर टेष्ट बन्द गरेका छौं । जिल्लामा हालसम्म २ हजार ४ सय ७० जनाको मात्रै स्वाब संकलन गरि परिक्षण गरिएको छ । जसमध्ये २ सय ३ जनाको कोरोना पुष्टि भएकोमा १ सय ९८ जनाले कोरोनालाई जितेर घर फर्किएका छन् । हाल ५ जना सक्रिय कोरोना संक्रमितको आइसोलेसन वार्डमा राखेर उपचार भइरहेको छ ।
कोरोना संक्रिय संक्रमितहरु मध्ये मन्थली नगरपालिकाको प्राथमिक स्वास्थ्य केन्दको आइसोलेसन वार्डमा ४ जना र गोकुलगंगा गाउँपालिकामा निमार्ण भएको आइसोलेसन वाडमा १ जनाको उपचार भइरहेको छ । यसवाहेक रामेछापका कुनै पनि कोरोना संक्रमित नभएको जिल्ला स्वास्थ्य कार्यालय रामेछापले जनाएको छ ।
कोरोना संक्रमितलाई राख्न निमार्ण गरिएका आइसोलेसन कक्ष र क्वारेन्टिन कक्ष सबै खाली रहेका छन् । रामेछापमा जिल्ला अस्पताल, मन्थली प्राथमिक स्वास्थ्य केन्द्र र दुई नगरपालिका र ६ वटा गाउँपालिकामा गरि १ सय ८ वेड क्षमताको आइसोलेसन कक्ष निमार्ण भएका छन् । त्यसैगरी ४ सय ९० वेड क्षमताको क्वारेन्टिन कक्ष स्थापना भएको छ । अहिले ती सवै आइसोलेसन कक्ष र क्वारेन्टिन कक्ष खालि भएका छन् ।
