जिरी । नेपाल पत्रकार महासंघ बागमती प्रदेश समितिले प्रेस स्वतन्त्रताको संरक्षण, सरकारी विज्ञापन प्रणालीमा पारदर्शिता तथा साना सञ्चारमाध्यमको प्रवर्द्धनलाई प्राथमिकतामा राख्दै ‘जिरी घोषणा पत्र’ सार्वजनिक गरेको छ।
जिरीमा चैत २७ र २८ गते सम्पन्न बैठकपछि प्रदेश समिति, जिल्लास्तरीय अध्यक्षहरू तथा विभिन्न पत्रकार सङ्गठनका प्रतिनिधिहरूको सहभागितामा ११ बुँदे घोषणा पत्र जारी गरिएको हो। महासंघ बागमती प्रदेशका अध्यक्ष कृष्ण सारु मगरका अनुसार बैठकले पत्रकारितासम्बन्धी समसामयिक मुद्दाहरूमा साझा धारणा सार्वजनिक गरेको हो।
घोषणा पत्रमार्फत सरकारी विज्ञापन प्रकाशन तथा प्रसारणमा देखिएका अनियमितता र विकृतिहरूमाथि निष्पक्ष छानबिन गर्न सरकारसँग माग गरिएको छ। साथै श्रमजीवी पत्रकारहरूले सञ्चालन गरेका साना तथा स्वरोजगारमुखी सञ्चारमाध्यमको संरक्षणका लागि समानुपातिक विज्ञापन नीति कार्यान्वयन गर्नुपर्नेमा जोड दिइएको छ।
त्यस्तै, स्थानीय तहबाट प्रवाह हुने सूचना तथा जनचेतनामूलक सामग्रीहरू स्थानीय सञ्चारमाध्यममार्फत नै प्रकाशन–प्रसारण हुने व्यवस्था गर्न संघीय, प्रदेश र स्थानीय सरकारको ध्यानाकर्षण गराइएको छ। संविधानले सुनिश्चित गरेको प्रेस तथा अभिव्यक्ति स्वतन्त्रता कुण्ठित हुने कुनै पनि कदम नचाल्न आग्रह गर्दै पत्रकारहरूको पेशागत सुरक्षा र स्वतन्त्रताको सुनिश्चितता अपरिहार्य रहेको उल्लेख गरिएको छ।
प्रदेश सरकारअन्तर्गत सञ्चारमाध्यम दर्तासम्बन्धी देखिएको अन्योलता अन्त्य गर्न संघीय र प्रदेश सरकारबीच समन्वय आवश्यक रहेको औंल्याउँदै बागमती प्रदेशमा सञ्चार रजिस्ट्रार कार्यालयलाई निरन्तरता दिन पनि आग्रह गरिएको छ।
घोषणा पत्रमा महासंघले श्रमजीवी पत्रकारहरूको अभिभावक संस्थाको रूपमा प्रभावकारी भूमिका निर्वाह गर्न नसकेको पछिल्ला घटनाक्रमले संकेत गरेको टिप्पणी गर्दै संगठनको गरिमा उकास्न केन्द्रीय समितिको ध्यानाकर्षण गराइएको छ।
बैठकले जलवायु परिवर्तनलाई पत्रकारिताको प्राथमिक एजेन्डा बनाउनुपर्ने निष्कर्ष निकाल्दै महिला, दलित, गरिब तथा सीमान्तकृत समुदायहरूका मुद्दालाई समाचारको केन्द्रमा राख्ने प्रतिबद्धता जनाएको छ। साथै आदिवासी तथा स्थानीय समुदायको ‘रैथाने ज्ञान’लाई अभिलेखीकरण गरी नीति निर्माण तहसम्म पुर्याउन पत्रकार समुदायले सक्रिय भूमिका खेल्ने उल्लेख गरिएको छ।
घोषणा पत्रले जिरी तथा आसपासका प्राकृतिक सम्पदामा जलवायु परिवर्तनले पारेको प्रभाव न्यूनीकरणका लागि सम्बन्धित निकायलाई आवश्यक पहल गर्न पनि आग्रह गरेको छ।
कार्यक्रम सम्पन्न गर्न सहयोग पुर्याउने बागमती प्रदेश सरकारको वन तथा वातावरण मन्त्रालय, महासंघ दोलखा शाखा तथा स्थानीय पर्यटन व्यवसायीप्रति आभार व्यक्त गरिएको छ।
बैठकको अन्त्यमा जोखिमपूर्ण रिपोर्टिङका क्रममा व्यक्तिगत सुरक्षामा ध्यान दिँदै बदलिँदो समयअनुसार व्यावसायिक, जिम्मेवार र स्वतन्त्र पत्रकारिता अभ्यास गर्न सम्पूर्ण सञ्चारकर्मीलाई अपिल गरिएको छ।
