काठमाडौं -नेपाली कांग्रेसका महामन्त्री विश्वप्रकाश शर्मा ले प्रधानमन्त्री केपी शर्मा ओलीको आसन्न भ्रमणका क्रममा लिपुलेक, लिम्पियाधुरा र कालापानीको विषय गम्भीरताका साथ उठाउन सुझाव दिनुभएको छ। शर्माले हालसालै भारत र चीनबीच लिपुलेकसँग सम्बन्धित विषय उठेको सन्दर्भमा आफ्नो धारणा राख्दै यस्तो सुझाव दिनुभएको हो। उहाँले यस विषयमा सरकारले अगाडि बढाउनुपर्ने छ वटा मुख्य पहल पनि सार्वजनिक गर्नुभयो।
महामन्त्री शर्माले भन्नुभयो, “ऐतिहासिक तथ्यहरूका आधारमा हाम्रा दुवै छिमेकीलाई विश्वासमा लिन आवश्यक छ। प्रधानमन्त्रीको आसन्न भ्रमणमा लिपुलेक, लिम्पियाधुरा र कालापानीको विषय प्रवेश गरिनुपर्छ।” शर्माले लिपुलेकको विषयमा सर्वपक्षीय वा सर्वदलीय बैठक आह्वान गर्न सरकारसँग माग गर्नुभएको छ। उहाँका अनुसार यस बैठक मार्फत विकसित घटनाक्रममा नेपालको एक्यवद्ध दृष्टि र साझा प्रतिबद्धता निर्माण गर्न सकिन्छ।
शर्माले सुझाएका प्रमुख पहलहरू यस प्रकार छन्:
- सरकारको आह्वानमा सर्वदलीय / सर्वपक्षीय बैठक सञ्चालन।
- बैठक मार्फत विकसित घटनाक्रममा साझा दृष्टिकोण र प्रतिबद्धता निर्माण।
- संसदले ३१ जेठ २०७७ मा संविधानको अनुसूची ३ मा सर्वसम्मत पारित गरेको ‘चुच्चे नक्सा’ अन्तर्राष्ट्रिय तथा आन्तरिक जगतमा थप स्पष्ट पार्ने।
- भारत र चीनबीच १५ मे २०१५ मा लिपुलेक सम्बन्धी भएको अघिल्लो सहमति सम्झाउँदै नेपालले पठाएको कुटनैतिक नोट स्मरण गराउने र पछिल्लो सहमति विषयक पुनः कुटनैतिक नोट पेश गर्ने।
- ऐतिहासिक तथ्यहरूका आधारमा दुवै छिमेकीलाई विश्वासमा लिन सुनिश्चित गर्ने।
- नेपाल–भारत सिमा र सम्बन्धबारे बौद्धिक सुझावका लागि दुवै देशको सहमतिमा गठित EPG (Eminent Persons Group) को सात वर्षअघि तयार प्रतिवेदन प्रधानमन्त्रीहरूले बुझ्ने र त्यसलाई आधार मान्दै अन्य विषयहरूको समाधान खोज्ने।
शर्माको यो सुझावले प्रधानमन्त्रीको भ्रमणलाई रणनीतिक रूपमा अझ प्रभावकारी र संवेदनशील बनाउने लक्ष्य राखेको छ।
