रामेछाप । जिल्ला प्रहरी कार्यालय रामेछापमा सरुवा भएर आएका प्रहरी नायव उपरिक्षक नबराज ढुंगानाले समग्र जिल्लाको शान्तिसुरक्षा र अपराध रोकथामको क्रममा कुनै राजनितिक दलको प्रभाब र दबाबमा नपरी काम गर्ने बताएका छन् ।
सो कुरा उनले आइतवार जिल्ला प्रहरी कार्यालयमा राजनितिक दल, पत्रकार, उद्योगी र नागरिक समाजसँग भएको भेटघाट कार्यक्रममा बताएका हुन् । उनले आफु जिल्लामा शान्तिसुृरक्षा कायम गराउन कटिवद्ध भएर लाग्ने भन्दै कानून बिपरित कसुर गर्ने जो सुकैलाई पनि नछाड्ने बताएका छन् । जिल्ला प्रहरी कार्यालयमा प्रहरी नायव उपरिक्षकको रुपमा ढुंगाना शुक्रवार मात्रै हाजिर भएका हुन् ।
आफ्नो कार्यकालमा रामेछापमा बस्दा समुदाय र प्रहरी बिच साझेदारी गरेर अघि वढ्ने र सबै राजनितिक दल, संञ्चारकर्मी र नागरिकहरुले प्रहरीलाई साथ दिन पनि प्रहरी नायव उपरिक्षक ढुंगानाले सहभागीसँग आग्रह गरे । जिल्लामा जागिर खान आएको हुँ, मेलै कुनै स्वार्थ लिएर यहाँ आएको छैन् । रामेछापमा वस्दा गुण्डागर्दी चल्न दिन्न र जघन्य बिषयका मुद्धामा मिलापत्र गर्ने काम आफ्नो कार्यकालमा नहुने पनि डिएसपी ढुंगानाले बताए
उनले भने– प्रहरीले समुदायसँग साझेदारी गरेर काम गर्नुपर्ने भएकाले पहिला प्रहरी संगठन भित्र पनि सुद्धिकरण हुनु जरुरी छ । पहिला म आफ्नो प्रहरी संगठन भित्र सुद्धिकरण गर्दै समुदायसँग समन्वय गरेर काम गर्ने छु, प्रहरी बलियो बनाउन सबै तर्फबाट सहयोग पुर्याए समाजलाई अपराध मुक्त बनाउन सकिने बताए ।
प्रहरीमा भएको भेटघाटको क्रममा जिल्लाको समस्याको बिषयमा राजनितिक दलका नेताहरु, पत्रकार, व्यवसायीहरुले जिल्लामा भएका विभिन्न समस्याका बिषयमा जानकारी गराएका थिए । जिल्लामा अहिले पनि अबैद्य रुपमा ढुङ्गा गिट्टी र बालुवा तस्करी भइरहेको, हाइड्रोपावरले नागरिकमाथी ज्यादती गर्दा समेत प्रहरी प्रशासनले त्यसतर्फ कुनै कदम नचालेको जस्ता बिषयलाई सहभागीहरुले उठाएका थिए ।
त्यसैगरी सहभागीहरुले जिल्लामा पछिल्लो समय आत्महत्याको संख्या अन्त्यतै बढेको भन्दै यसलाई न्युनिकरण गर्न स्थानिय सरकारसँग समन्वय गरेर प्रहरीले अभियान नै चलाउनु पर्ने धारणा राखेका थिए । अहिले शहर केन्द्रित ट्राफिक जनशक्तिलाई गाउँ केन्द्रित गर्नुपर्ने भन्दै ट्राफिक प्रहरीले चालकसँग बढी मात्रामा जरिवाना मात्रै काट्ने गुनासो वढेकाले यसलाई सचेतीकरण कार्यक्रम पनि सँगै लैजानु पर्ने सहभागीहरुले बताएका थिए ।
कार्यक्रममा सहभागी राजनितिक दलका नेताहरुले कुनै पनि घटनामा संलग्न व्यक्तिको बिषयमा दबाब सिर्जना नगर्ने प्रतिबद्धता जनाएका छन् । घटनामा संलग्न व्यक्तिलाई कानून अनुसार कारवाहीको दायरामा ल्याएर पिडीतलाई प्रहरीले न्याय दिए पुग्छ, यस बिषयमा पार्टीबाट कुनै दबाब दिदैनौं सहभागी राजनितिक दलका नेताहरुले सामुहिक प्रतिवद्धता समेत गरेका छन् ।
प्रहरीसँगको भेटघाट कार्यक्रममा नेपाली काँग्रेसका जिल्ला सचिव लेखवहादुर कार्की, नेकपा रामेछापका अध्यक्ष आनन्द श्रेष्ठ, राप्रपा नेपालका अध्यक्ष रामचन्द्र शर्मा, नेपाल पत्रकार महासंघका जिल्ला अध्यक्ष रमेश ढुङेल र पूर्व अध्यक्ष टीकाप्रसाद भट्ट, उद्योग बाणिज्य संघ बागमती प्रदेशका सदस्य श्याम थापा, रामेछाप उद्योग वाणिज्य संघका जिल्ला अध्यक्ष केशव प्रसाद घिमिरे लगाएतका व्यक्तिहरुले जिल्लाको समग्र अवस्थाको बिषयमा जानकारी गराएका थिए ।