रामेछाप । मन्थली नगरपालिका वडा नम्बर १० चनखुमा पूर्व गाविस अध्यक्ष कार्कीको सालिक अनावरण भएको छ । साबिक चनखु गाविस अध्यक्ष रामबहादुर कार्कीको बुधवार पुण्य तिथिको अवसरमा सालिक अनावरण गरेको हो । पारिवारिक लगानीमा नवनिर्मित कार्कीको सालिक नेपाली काँग्रेस रामेछापका पूर्व पार्टी सभापति रामचन्द्र खड्का तथा नेपाली काँग्रेस बागमती प्रदेश सदस्य अर्जुन केसीले संयुक्त रूपमा अनावरण गरेका हुन् । १९८१ साल भाद्र १९ गते जन्मिएका कार्की २०४९ सालमा ६८ वर्षको उमेरमा नेपाली काँग्रेस बाट गाविस अध्यक्ष भएर गाविसको नेतृत्व समालेका थिए । उनको २०७७ साल चैत्र ०४ गते ९६ वर्षको उमेरमा निधन भएको थियो ।
सालिकको अनावरण गर्दै पूर्व पार्टी सभापति खड्का र प्रदेश सदस्य केसीले तत्कालीन समयमा काँग्रेसमा कार्कीले पुर्याएको योगदान अमूल्य रहेको बताएका छन् । कार्कीको योगदानको चर्चा गर्दै काँग्रेस नेताहरूले उहाँले पुराएको योगदानको मुल्याङ्गकन हुन नसकेको भन्दै दुःख समेत व्यक्त गरे ।
कार्यक्रममा नेपाली काँग्रेस बागमती प्रदेश सदस्य जितबहादुर मगर जिल्ला कार्यसमिति उपसभापति नवराज थोकर, सचिव विनोद कार्की, पुव पार्टी प्रवक्ता नारायण बोगटी, महाधिवेशन प्रतिनिधिहरू भरत चौलागाई, झपडराज भण्डारी, युबराज भट्टराई ,लगायत नेपाली काँग्रेसका नेता कार्यकर्ताहरूको सहभागिता रहेको थियो ।
