काठमाडौँ । सामाजिक सञ्जाल टिकटक चलाउनका लागि फ्री भिपिएन र ओपेन डिएनएस प्रयोग नगर्न सञ्चार तथा सूचना प्रविधि मन्त्रालयले आग्रह गरेको छ । टिकटक चलाउनका लागि फ्री भिपिएन डाउनलोड गर्ने र ओपेन डिएनएस प्रयोग गरी टिकटक चलाउने कार्य भएको भन्दै सरकारले उक्त कार्य बाट हुन सक्ने जोखीम ठुलो रहेको भन्दै सबैमा टिकटक नचलाउन आग्रह गरेको छ ।
सरकारले टिकटक चलाउन प्रतिबन्ध लगाएसँगै पछिल्लो समय सामाजिक सञ्जाल टिकटक चलाउनका लागि फ्री भिपिएन डाउनलोड गर्ने र ओपेन डिएनएस प्रयोग गरी टिकटक चलाउने प्रयोगकर्ता बढेका छन् । सोही सम्बन्धमा प्रविधिको दुरुपयोग भएको भन्दै यस्ता प्रविधिहरू प्रयोग नगर्न सञ्चार मन्त्रालयले सबैलाई आग्रह गरेको हो ।
नेपाल सरकारको मन्त्रीपरिषद्को बैठकले कात्तिक २७ गते, टिकटक बन्द गर्ने निर्णय गरेको थियो । यद्यपी हाल टिकटक फ्री भिपिएन र डिएनएस जस्ता असुरक्षित अवैध माध्यमबाट सञ्चालन भइरहेको समेत मन्त्रालयले जनाएको छ ।
