रामेछाप । नेपाल आदिवासी जनजाति पत्रकार महासङ्घ (फोनिज) जिल्ला शाखा रामेछापले आफ्नो २५ औँ स्थापना दिवस भव्य रूपमा मनाएको छ । फोनिज रामेछापले २५ औँ स्थापना दिवसका अवसरमा जिल्लाका दुई जना सक्रिय पत्रकारलाई पुरस्कृत तथा सम्मान गरेको छ ।
रामेछाप नगरपालिकाको सभा हलमा आयोजित कार्यक्रममा खोज पत्रकारिता वर्ष पुरस्कारबाट पत्रकार नवराज पथिक र उत्कृष्ट आदिवासी जनजाति पत्रकारिता वर्ष पुरस्कारबाट तुलसीदेवी श्रेष्ठलाई सम्मान गरिएको हो । श्रेष्ठलाई नगद रु १० हजार सहित र पथिकलाई नगद रु ५ हजार सहित सम्मान पत्र र दोसल्लाले सम्मान गरिएको हो ।
कार्यक्रमका प्रमुख अतिथि ऊर्जा जलश्रोत तथा सिँचाई राज्य मन्त्री पूर्ण बहादुर तामाङ(कान्छाराम)ले सम्मान पत्र प्रदान गर्नुभयो । सम्मानित पथिक राष्ट्रिय तथा स्थानीय विभिन्न सञ्चार माध्यममा सक्रिय रूपमा पत्रकारिता गर्दै आउनु भएको छ भने श्रेष्ठ रेडियो तिफदीमा लामो समय देखी क्रियाशील रूपमा काम गर्दै आउनुभएको छ ।
फोनिज रामेछापका अध्यक्ष कुमार श्रेष्ठको अध्यक्षतामा भएको कार्यक्रममा रामेछाप नगरपालिकाका प्रमुख लबश्री न्यौपाने,फोनिज बागमती प्रदेशका अध्यक्ष युवराज श्रेष्ठ लगायतले शुभकामना व्यक्त गरेका थिए ।
