काठमाडौँ, साउन २४ — स्थानीय सरकारका प्रतिनिधिहरूले मिडियालाई सत्य, सन्तुलित र तथ्यपूर्ण समाचार प्रकाशन गरेर मुलुकलाई समृद्ध बनाउने अभियानमा सहकार्य गर्न आग्रह गरेका छन्। नेपाल आदिवासी जनजाति पत्रकार महासङ्घ (फोनिज) काठमाडौं शाखाले शनिबार राजधानीमा आयोजना गरेको ‘अधिकार र पहिचानका लागि जनजाति पत्रकारको भूमिका’ विषयक अन्तरसंवाद कार्यक्रममा सहभागी प्रतिनिधिहरूले यस्तो धारणा राखेका हुन्।
कार्यक्रममा बुढानिलकण्ठ नगरपालिकाकी उपप्रमुख अनिता लामाले उपमेयरलाई अधिकार सीमित भएको उल्लेख गर्दै आदिवासी विषयमा काम गर्न खोज्दा अवरोध र विभेद हुने गरेको अनुभव सुनाइन्। उनले आदिवासी पत्रकारसँग नगरपालिकाले समन्वय र सहकार्य गर्नुपर्ने सुझाव दिँदै कतिपय सूचनाहरू पत्रकारहरूले आफैं खोज्नुपर्ने पनि बताइन्।
शङ्खरापुर नगरपालिकाकी उपप्रमुख समिता श्रेष्ठले आदिवासी र गैर–आदिवासी दुवै प्रकारका पत्रकारसँग समन्वय भइरहेको जनाउँदै प्रस्तावसहित सहकार्य गर्न आएमा आर्थिक सहयोग गर्न सहज हुने धारणा राखिन्। उनले आदिवासी पत्रकारको हकहितका लागि आगामी दिनमा सहयोग गर्ने प्रतिबद्धता व्यक्त गरिन्।
गोकर्णेश्वर नगरपालिकाकी उपप्रमुख सान्नानी लामाले पत्रकारहरूले नगरपालिकाको गतिविधि जनतासम्म पुर्याउने महत्वपूर्ण भूमिका खेलिरहेको बताउँदै गलत सूचनाका कारण कहिलेकाहीँ समस्या सिर्जना हुने गुनासो सुनाइन्।
फोनिजका संघीय अध्यक्ष लक्की चौधरीले पत्रकारितामा केही विकृति भए पनि समग्र क्षेत्र जिम्मेवार रहेको बताए। उनले गलत समाचारका कारण जनतामा भ्रम फैलिन सक्ने भएकाले पत्रकारहरू सधैं गल्ती सच्याउन तयार रहनुपर्नेमा जोड दिए।
बौद्ध गुरु कोसिस लामाले केवल पत्रकार उत्पादन मात्र नगरी उनीहरूको क्षमता अभिवृद्धिमा जोड दिनुपर्ने सुझाव दिए। उनका अनुसार दक्ष र सक्षम पत्रकार भए मात्र पत्रकारिता जिम्मेवार र प्रभावकारी बन्छ।
फोनिज काठमाडौं शाखाका अध्यक्ष भीम लामाको अध्यक्षतामा सम्पन्न कार्यक्रममा फोनिज बागमती प्रदेशका महासचिव राजु नापित, प्रदेश इञ्चार्ज सुरेन्द्रभक्त श्रेष्ठसहित जिल्ला शाखाका पदाधिकारी र सदस्यहरूको सहभागिता थियो।
