रामेछाप । रामेछापका प्रमुख जिल्ला अधिकारी राजु पौडेलले शान्ति सुरक्षालाई पहिलो प्राथमिकता राखेर काम गर्ने बताएका छन् । रामेछापको प्रमुख जिल्ला अधिकारीको रूपमा आइतबार देखी रामेछाप आएका पौडेलले पत्रकारहरू सँग सुझाव लिँदै सुरक्षालाई पहिलो प्राथमिकता राखेर काम गर्ने बताएका हुन् ।
प्रमुख जिल्ला अधिकारीको रूपमा डडेलधुरा स्याङ्जा लगायत जिल्लामा प्रमुख जिल्ला अधिकारीको जिम्मेवारीमा रहेर काम गरिसकेको भन्दै शान्ति सुरक्षा ,अमन चयन कायम, सेवा प्रवाह र सुशासन, विकासमा सहजिकरण र विपद् व्यवस्थापनका क्षेत्रलाई प्राथमिकतामा राखेर काम गर्ने बताएका छन् ।
जिल्ला स्थित राजनीतिक दल, स्थानीय सरकार, पत्रकार, नागरिक समाज, रामेछाप उद्योग वाणिज्य सङ्घ लगायतका सरोकारवाला निकायहरूसँग आवश्यक सुझाव सल्लाह लिएर अगाडी बढ्ने पनि बताएका छन् ।
साथै पत्रकारहरूले बजार अनुगमन, हाइड्रो पावर को दादागिरी, यातायातका साधनहरूको व्यवस्थापन, जिल्लाको सीमा विवाद , पर्यटन प्रवर्द्धन र सूचनाको पहुँच लगायतका विषयमा दिएको सुझावलाई विशेष प्राथमिकतामा राखेर काम गर्ने बताएका छन् ।
