काठमाडौं । राष्ट्रिय स्वतन्त्र पार्टी (रास्वपा) ले सरकार गठन र सम्भावित मन्त्रीको नामबारे अहिले नै हतार नगर्न आग्रह गर्दै पहिले संसदीय दलको नेता चयन गर्ने प्रक्रिया अघि बढाइने जनाएको छ। दलका नेताहरूले संसदीय दलको नेतृत्व टुंगो लागेपछि मात्रै मन्त्रीको नाम र मन्त्रालय बाँडफाँटबारे औपचारिक छलफल हुने स्पष्ट पारेका छन्।
पार्टीभित्र पछिल्ला दिनमा सम्भावित मन्त्रीका नाम सार्वजनिक हुँदै विभिन्न अड्कलबाजी भइरहेका बेला रास्वपाका नेताहरूले त्यसलाई हतारो र आधारहीन टिप्पणीको रूपमा लिएका छन्। पार्टी नेतृत्वका अनुसार अहिलेको प्राथमिकता समानुपातिक तर्फका सांसदहरूको नाम अन्तिम गर्ने र संसदीय दलको नेता चयन गर्ने प्रक्रियालाई टुंग्याउनु हो।
प्रधानमन्त्रीका रूपमा प्रस्तावित गरिएका वरिष्ठ नेता बालेन शाह हाल चुनावी दौडधुपपछि आराम गरिरहेका छन्। लगातारको यात्राका कारण उनी हल्का बिरामी रहेका छन्। उनी पार्टी सभापति रवि लामिछानेलाई भेट्न बिहीबार निवास पुगेका थिए। लामिछाने पनि स्वास्थ्यलाभको क्रममा रहेकाले दुवै नेताले हाल बाहिरी भेटघाटलाई सीमित गरेका छन्।
बालेननिकट स्रोतका अनुसार सभापति लामिछाने र बालेनबीच आगामी सरकार गठनको सम्भावित खाकाबारे सामान्य कुराकानी भए पनि मन्त्रीहरूको नाम र जिम्मेवारी बाँडफाँटबारे औपचारिक छलफल सुरु भइसकेको छैन। सामाजिक सञ्जालमा विभिन्न मन्त्रालयका सम्भावित नामहरू सार्वजनिक भइरहे पनि त्यसमा पार्टी नेतृत्वले कुनै निर्णय नगरेको उनीहरूको भनाइ छ।
रास्वपाले यसपटक करिब १२ देखि १३ सदस्यीय मन्त्रिपरिषद् गठन हुन सक्ने संकेत गरेको छ। तर को–को कुन मन्त्रालयमा जाने भन्ने विषयमा अहिले नै निष्कर्षमा पुग्ने अवस्था नरहेको नेताहरूले बताएका छन्।
यसबीच अर्थमन्त्रीका रूपमा पूर्वअर्थसचिव रामेश्वर खनालको नाम चर्चामा आए पनि बालेन टिमले त्यसलाई पूर्ण रूपमा निराधार हल्ला भएको जनाएको छ। पार्टी स्रोतका अनुसार मन्त्री चयन संविधानअनुसार हाल निर्वाचित सांसदहरूमध्येबाटै गरिनेछ।
निर्वाचन आयोगले समानुपातिक सूची अन्तिम गरेपछि राष्ट्रपतिसमक्ष निर्वाचन प्रतिवेदन बुझाउने कार्यक्रम रहेको छ। त्यसपछि मात्रै संसदीय दलको नेता चयन, अनि सम्भावित मन्त्रीबारे पार्टीभित्र औपचारिक छलफल सुरु हुने रास्वपाका नेताहरूले बताएका छन्।
पार्टी नेतृत्वले विशेष परिस्थितिमा सम्पन्न भएको चुनावले दिएको जनमतलाई गम्भीरतापूर्वक बुझ्नुपर्ने भन्दै अनावश्यक अनुमान र टिप्पणीमा नअल्झिन कार्यकर्ता तथा आकांक्षीहरूलाई सचेत गराएको छ। उनीहरूका अनुसार सभापति रवि लामिछाने र वरिष्ठ नेता बालेन शाहबीच हुने सहमतिकै आधारमा पार्टीले आगामी निर्णयहरू संस्थागत गर्नेछ।
