काठमाडौँ–तराई मधेस द्रुतमार्ग (फास्ट ट्र्याक) निर्माण समयमै सक्ने विषयमा विभागीय मन्त्री र नेपाली सेनाबीच फरक बुझाइ सार्वजनिक भएको छ। सिंहदरबारमा बिहीबार बसेको सङ्घीयता सबलीकरण तथा राष्ट्रिय सरोकार समितिको बैठकमा रक्षा मन्त्रालयअन्तर्गतका राष्ट्रिय गौरवका आयोजनाको प्रगति, समस्या र समाधानबारे छलफल भएको थियो। सो क्रममा रक्षा मन्त्री मानवीर राई र प्रधानसेनापति अशोकराज सिग्देलले फास्ट ट्र्याकको समयसीमा मूल्याङ्कनमा भिन्न धारणा राखे।
मन्त्री राईले २०८३ सालभित्र परियोजना सम्पन्न हुनेमा शंका व्यक्त गर्दै भने, “०८३ सम्म बन्छ भन्ने विश्वास छैन, तर मेलम्चीको जस्तो लामो समय भने लाग्दैन।” उनका अनुसार नेपालमा निजी स्वामित्वको जग्गा अधिग्रहण र जंगलसम्बन्धी कानुनी प्रक्रिया परियोजना निर्माणमा मुख्य चुनौती बनेका छन्।
तर, प्रधानसेनापति सिग्देलले भने सेनाले ०८३ सालको चैत्रसम्म द्रुतमार्ग सम्पन्न गर्ने अठोट दोहोर्याए। उनका अनुसार हालसम्म करिब ४३ प्रतिशत काम सकिएको छ र बाँकी भाग छिटो सक्ने प्रकृतिको छ। “हामी समयमै काम सक्छौँ, त्यसैअनुसार अघि बढिरहेका छौँ,” उनले प्रष्ट पारे। एकै बैठकमा आएका यी फरक मूल्याङ्कनपछि फास्ट ट्र्याकको वास्तविक प्रगति र समयसीमा फेरि चर्चाको विषय बनेको छ।
