काठमाण्डौं । पाकिस्तानमा लगातारको भारी मनसुन वर्षाले निम्त्याएको बाढी र पहिरोका कारण पछिल्लो ४८ घण्टामा कम्तीमा ३२० जनाको ज्यान गएको छ।
सबैभन्दा बढी क्षति खैबर पख्तुनख्वा प्रान्तमा भएको हो, जहाँ १८० जनाको मृत्यु भएको छ। पाकिस्तान अधीन कश्मीरमा नौ जना र गिलगित–बाल्टिस्तान क्षेत्रमा पाँच जनाको ज्यान गएको विवरण आएको छ।
बाढी र पहिरोका कारण महिलासहित धेरै बालबालिकाको ज्यान गएको छ। उद्धार कार्यका क्रममा प्रान्तीय सरकारको हेलिकोप्टर दुर्घटना हुँदा दुई पाइलटसहित पाँच जनाको मृत्यु भएको छ।
सरकारले बुनर, बजौर, मानसेहरा र बट्टाग्राम जिल्लालाई ‘विपद् प्रभावित क्षेत्र’ घोषणा गरेको छ। स्थानीय बासिन्दाले घटनालाई ‘प्रलय’ र ‘प्रलयको दिन’ सरह भयावह भएको बताएका छन्।
पाकिस्तानको मौसम विभागले आगामी दिनहरूमा अझै भारी वर्षा हुने चेतावनी दिँदै जोखिमयुक्त स्थानबाट सुरक्षित बस्न आग्रह गरेको छ। शनिबारलाई राष्ट्रिय शोक दिवस घोषणा गरिएको छ, जसअन्तर्गत राष्ट्रिय झण्डा आधा झुकाइने छ र मृतकहरूलाई राज्य सम्मानसहित अन्त्येष्टि गरिनेछ।
विशेषज्ञहरूका अनुसार जलवायु परिवर्तनका कारण पाकिस्तानमा यस्ता चरम मौसमी घटनाहरू बढ्दो क्रममा छन्। असामान्य मनसुन वर्षाले यस वर्ष अहिलेसम्म ५०० जनाभन्दा बढीको ज्यान लिइसकेको छ।
