सर्वोच्च अदालतको परमादेशसँगै नेकपा (एमाले) का अध्यक्ष एवं पूर्व प्रधानमन्त्री केपी शर्मा ओली १३ दिन लामो प्रहरी नियन्त्रणबाट मुक्त हुनुभएको छ । मुद्दा चलाउने ठोस प्रमाण र पर्याप्त आधार नभेटिएको ठहर गर्दै अदालतले उहाँलाई तत्काल रिहा गर्न आदेश दिएको हो । रिहा लगत्तै सामाजिक सञ्जालमा तिखो प्रतिक्रिया दिँदै ओलीले वर्तमान सरकारले आफूमाथि ‘राजनीतिक प्रतिशोध’ साँधेको र झुटा फौजदारी अभियोग लगाएर गैरकानुनी रूपमा बन्दी बनाएको आरोप लगाउनुभएको छ ।
हाल स्वास्थ्य समस्याका कारण त्रिवि शिक्षण अस्पतालमै उपचाररत रहनुभएका ओलीले आफ्नो रिहाइको माग गर्दै सडकमा उत्रिएका र प्रहरीको दमनमा परी घाइते भएका कार्यकर्ताहरूप्रति सहानुभूति प्रकट गर्नुभएको छ । उहाँले घाइतेहरूको उपचार खर्च राज्यले बेहोर्नुपर्ने माग राख्दै यदि सरकार उदासीन देखिएमा पार्टीले नै सम्पूर्ण उपचार खर्चको जिम्मेवारी लिने स्पष्ट पार्नुभएको छ । न्यायको पक्षमा उभिने कानुन व्यवसायी, राजनीतिक दल, सञ्चारकर्मी र न्यायालयप्रति उच्च सम्मान व्यक्त गर्दै उहाँले यो रिहाइलाई विधिको शासनको जितका रूपमा अथ्र्याउनुभएको छ ।
