रामेछाप । जिल्ला प्रशासन कार्यालय रामेछापमा श्रमिकहरूको न्यूनतम पारिश्रमिक रु २५ हजार हुनुपर्ने माग राख्दै ट्रेड युनियन काँग्रेस रामेछापले ज्ञापन पत्र बुझाएको छ । ट्रेड युनियन काँग्रेस रामेछापले बिहीबार श्रमिकहरूको न्यूनतम पारिश्रमिक रु २५ हजार हुनुपर्ने माग राख्दै रामेछापकी प्रमुख जिल्ला अधिकारी अनिता निरौला मार्फत श्रम रोजगार तथा सामाजिक सुरक्षा मन्त्री शरद सिं भण्डारी लाई ज्ञापन पत्र बुझाएको हो ।
ज्ञापन पत्र बुझाउँदै ट्रेड युनियन काँग्रेस रामेछापका अध्यक्ष अर्जुन श्रेष्ठले नेपालको श्रम ऐन २०७४ मा व्यवस्था भए अनुसार श्रम ऐन २०७४ कार्यान्वयन गर्नु पर्ने बताएका छन् । श्रम ऐन २०७४ अनुसार प्रत्येक २÷२ वर्षमा त्रिपक्षीय सहमतिका आधारमा श्रमजीवीहरूको न्यूनतम पारिश्रमिक निर्धारण गरी श्रावण देखि लागु गर्नु पर्नेमा सरकार र सम्बन्धित निकाय छलफलमा बस्दा कुनै निष्कर्ष निस्कन नसकेकोले श्रमजीवीहरूको हक र अधिकार सँग सम्बन्धी निर्णय गर्न माग पनि युनियनले सम्बन्धित पक्षलाई गरेको छ ।
वर्तमान अवस्थाको आकासिँदो महँगीमा सबै श्रमिकहरूको वर्तमान न्यूनतम पारिश्रमिक अत्यन्तै न्यून भएको भन्दै साउन १ गते देखिनै लागु हुने गरी न्यूनतम पारिश्रमिक रु २५ हजार हुनुपर्ने माग ज्ञापन पत्रमा उल्लेख गरिएको छ ।
ज्ञापन पत्र बुझाउन निवर्तमान अध्यक्ष पुण सुबेदी सहित समितिका पदाधिकारी सदस्य र प्रेस युनियनका पत्रकारहरू जिल्ला प्रशासन कार्यालय पुगेका थिए ।
