रामेछाप । जिल्लाको गोकुलगंगा गाउँपालिका–१ चुरचुरेका मदन परियार नक्कली नोट सहित पक्राउ परेका छन् । परियार सहित काठमाडौँको तारकेश्वर नगरपालिकाबाट अन्य २ जना समेत पक्राउ परेको प्रहरीले जनाएको छ । परियार सहित खोटाङ दिपु्रङ गाउँपालिका ५ का लक्ष्मी पाण्डे र लमजुङ दोर्दी गाउँपालिका वडा नं २ का सुवास गुरुङ रहेको छ ।
उनीहरूलाई तारकेश्वर ५ स्थित गोलढुंगा नगिनी खोला अगाडिबाट मङ्गलवार साँझ सशस्त्र प्रहरी बलको टोलीले पक्राउ गरेको हो । पक्राउ परेकाहरूको डेरामा छापा मार्दा नेपाली रुपैयाँ एक हजारको १ सय ८१ थान नक्कली नोट र नोट बनाउन प्रयोग हुने कागज २ सय थान बरामद भएको सशस्त्र प्रहरीका सहायक प्रवक्ता शैलेन्द्र थापाले जानकारी दिए ।
साथै नोट छाप्न प्रयोग हुने मेसिन फेला नपरेकाले अन्यत्रबाट नक्कली नोट बनाएर ल्याएको आशङ्का प्रहरीले गरेको छ । उनीहरूलाई बरामद भएको सामानसहित आवश्यक कारबाहीका लागि स्थानीय प्रहरीलाई बुझाइएको प्रवक्ता थापाले बताए ।
