रामेछाप । आगामी बैशाख ३० गते हुने स्थानिय तहको निर्वाचनको मिति नजिकीदै गर्दा रामेछापका ८ वटा स्थानिय तहको प्रमुखमा नेपाली काँग्रेस पार्टीवाट प्रमुख पदमा उठ्ने व्यक्तिहरुको नाम चर्चामा आउन थालेको छ ।
केन्द्रमा पाँच दलिय गठबन्धनले संयुक्त रुपमा स्थानिय तहको निर्वाचनमा आपसी सहमतीको आधारमा होमिने भनेता पनि उक्त निर्णय अनुसार जिल्लामा बसेको पाँच दलिय गठबन्धनको बैठकले उम्मेदवारको टुङ्गो लगाउन सकेको छैन् । यता नेपाली काँग्रेसका स्थानिय तहमा भने क–कसले उम्मेदवारी दिन सक्छन भन्ने बिषयमा विभिन्न नेताको नामहरु बजारमा यत्रतत्र रुपमा चर्चामा आउन थालेका छन् ।
जिल्लाको दुई नगरपालिका मध्ये मन्थली नगरपालिकाको प्रमुखमा युबराज भट्टराई, बिनोद कार्की र महेश कार्कीले यसअघि नै आ–आफ्नो उम्मेदवारी घोषणा गरिसकेका छन् । त्यसैगरी रामेछाप नगरपालिकाको प्रमुखमा हालका नगरपालिकाका नगर प्रमुख नरवहादुर थापामगर र उप–प्रमुख सिजृना खड्का, नेपाली काँग्रेसका पूर्व पार्टी सभापति लवश्री न्यौपाने, काँग्रेसका उप–सभापति लेखवहादुर कार्की, नेपाली काँग्रेसका नेता रत्न वहादुर कार्की र कमल विक्रम कार्कीको नाम चर्चामा आएको छ ।
त्यसैगरी उमाकुण्ड गाउँपालिकाको प्रमुख पदमा दावेदार गर्नेहरुमा झपडराज भण्डारी, हिक्कमत सुनुवार, आङदेण्डी शेर्पा, भिमसेन बस्नेत, पेम्वा शेर्पा र उर्मिला कार्की (बस्नेत) रहेका छन् । त्यस्तै गोकुलगंगा गाउँपालिकाको प्रमुख पदको दावेदारहरुमा नानी बाबु बस्नेत,काजी बहादुर खड्का (दिनेश), तेजबहादुर कार्की, मणिकुमार लामा ,दीपक खड्का र कुमार लामा को नाम चर्चामा आएको छ ।
यसैगरी लिखु तामाकोशी गाउँपालिकाको प्रमुख पदमा कृष्ण बहादुर महत, शुवाषचन्द्र महत, केशव महत, भोजवहादुर खडका (सुन्दर) र जीवन कार्कीको नाम चर्चामा रहेको छ । त्यस्तै दोरम्वा गाउँपालिकाको प्रमुखमा अहिलेसम्म नेपाली काँग्रेसवाट कसैको पनि नाम चर्चामा आएको छैन् । स्थानिय तहमा कसलाई उम्मेदवार बनाउने भन्ने बिषयमा पार्टीभित्र छलफल जारी रहेको एक नेताले जानकारी दिए ।
त्यस्तै सुनापति गाउँपालिकाको प्रमुख पदमा काँग्रेसका नेता जितेन्द्र कुमार मोक्तान, दिपेन्द्र खड्का र सुरेन्द्र घिसिङको नाम चर्चामा आएको छ । यसैगरी खाँडादेवी गाउँपालिकाको प्रमुख पदमा झनक श्रेष्ठ, ध्रुव लामा, नारायण कार्की, नवराज थोकर र राजनारायण श्रेष्ठको नाम चर्चामा आएको छ । स्थानिय तहको निर्वाचनमा उम्मेदवारी बन्ने नेताहरुको नाम वजारमा चर्चामा आएता पनि को उम्मेदवार भन्ने बिषयमा अझै टुङ्गो लाग्न सकेको छैन् ।
यता नेपाली काँग्रेस रामेछापले केन्द्रले दिएको निर्देशनअनुसार पाँच दलिय गठवन्धनको बैठक जारी राखेको छ । गठवन्धनको बैठकमा पालिकाको प्रमुख, उप–प्रमुख लगाएत वडा तहका अध्यक्ष पदहरुमा आ–आफ्नै दावी गरेकाले बैठकले पूर्णता पाउन सकेको छैन् । अहिले पनि गठवन्धनको बैठक जारी रहेको नेपाली काँग्रेस रामेछापले जनाएको छ । जसका कारण काँग्रेसवाट उम्मेदवारको चर्चा चलेता पनि टिकट कसले पाउँछन् सो बिसयमा भने भन्नसक्ने अवस्था छैन् ।
