निर्वाचन आचारसंहिताको कारण दुइ वटा कार्यक्रम स्थगित
मेरो प्रदेश डेक्स
मन्थली, माघ १५
रामेछापमा दुई महत्वपूर्ण कार्यक्रम निर्वाचन आचारसंहिताका कारण स्थगित भएका छन्।जिल्ला खेलकुद विकास समितिले माघ २२ र २३ गते आयोजना गर्ने भनिएको १३औँ जिल्ला स्तरीय राष्ट्रपति रनिङ शिल्ड प्रतियोगिता हाललाई स्थगित गरिएको जनाएको छ। प्रतिनिधि सभा निर्वाचनसँग सम्बन्धित आचारसंहिता लागू भएपछि प्रतियोगिता अगाडि बढाउन नसकिएको समितिको भनाइ छ। प्रतियोगिताको नयाँ कार्यतालिका अवस्था अनुकूल भएपछि सार्वजनिक गरिने जानकारी दिइएको छ।त्यसैगरी, रामेछाप नगरपालिकाले माघ २१ गते आयोजना गर्ने तय गरिएको कृषि मेला प्रदर्शनी पनि स्थगित गरेको छ। निर्वाचन आचारसंहिता लागू रहेकाले अर्को सूचना जारी नभएसम्म मेला आयोजना नहुने नगरपालिकाले स्पष्ट पारेको छ। निर्वाचन प्रक्रिया सम्पन्न भएपछि परिस्थितिको मूल्याङ्कन गरी नयाँ मिति तोकेर कृषि मेला प्रदर्शनी सञ्चालन गरिने नगरपालिकाले जनाएको छ।
