रामेछाप । निर्माण व्यवसायीको लापरबाहीका कारण कालोपत्रे सम्पन्न भएको एक महिना नपुग्दै जिल्ला सदरमुकाम मन्थलीको विभिन्न स्थानमा गरिएको कालोपत्रे उप्कन थालेका छन् । वर्षाको समयमा हतार हतारमा काम सम्पन्न गर्ने गरी काम गर्दा भर्खरै गरेको कालोपत्रे उप्कन थालेको हो ।
केही दिन अघि देवकोटा चोकमा उप्कन थालेपछि तत्काल टालटुल गरे पनि फेरी उप्कन थालेको छ । जिल्ला सदरमुकाममा गरेको कालोपत्रेमा त यो प्रकारको लापरबाही छ भने अन्य स्थानमा के कति निर्माण व्यवसायीको लापरबाही छ भन्न सक्ने अवस्था छैन । गोलोञ्जोर कन्स्ट्रक्सन सिन्धुलीले मन्थली बजार क्षेत्रमा ६४ लाख रुपैयाँमा मर्मतको काम सम्पन्न गरेको भए पनि हाल मन्थलीको देवकोटा चोक र विनीता चोक नजिक सबै सडकहरू उप्कन थालेका छन् । यस विषयमा गोलोञ्जोर कन्स्ट्रक्सन सिन्धुलीका सञ्चालक सुवास देवकोटा सँग सम्पर्क गर्न खोज्दा फोन उठेन । डिभिजन सडक कार्यालयका इन्जिनियर प्रदीप तामाङले बेसमा कम जारी भएको कारण त्यस्तो समस्या आएको बताएका छन् । डिभिजन सडक कार्यालयका इन्जिनियर तामाङले मौसम सफा भए सँगै पुनः मर्मत गर्न निर्माण कम्पनीलाई लगाउने बताएका छन् । तामाङले भने “उहाँहरूको भुक्तानी भएको छैन । हामी अन्तिम भुक्तानी गर्ने बेला जहाँ जहाँ समस्या देखिएको छ । सुधार नगरे सम्म भुक्तानी गर्दैनौँ ।” एक वर्ष सम्म निर्माण कार्यमा समस्या आए निर्माण कम्पनीले व्यर्होन पर्ने हुन्छ । अहिले देखिएको समस्या छिटै सुधार हुने उहाँले बताउनु भयो ।
