रामेछाप । लिखु तामाकोशी गाउँपालिकाले स्वास्थ्यको पहुँचमा पुग्न नसकेका ग्रामिण भेगमा नागरिकलाई गाउँमै विशेषज्ञ सहितको निःशुल्क स्वास्थ्य सेवा प्रदान गरेको छ ।
गाउँपालिका र नेपाल छारेरोग संघ र काठमाण्डौं मोडल अस्पतालको संयुक्त आयोजना र तामाकोशी अस्पतालको सहयोगमा नादहको झट्टेश्वर माध्यमिक विद्यालयमा शिविरको आयोजना गरेको हो । पालिकाभित्र हालसम्म सुविधा सम्पन्न एउटा पनि अस्पताल नहुँदा बिरामीले सहज तरिकाले उपचार पाउन सकेका थिएनन् । उक्त शिविरवाट ७ सय नागरिकले निःशुल्क स्वास्थ्य जाँच र औषधी पाएका छन् ।
सामान्य विरामी हुँदा त गाउँमै रहेको स्वास्थ्य चौकीमा उपचारको लागि जाने गर्दथे । गाउँमा उपचार सम्भव नभएका भित्री रोग भएका बिरामीहरु भने उपचार गर्न सदरमुकाम मन्थलीसम्म जानुु पर्ने वाध्यता थियो । यसपटक भने जनप्रतिनिधिहरुले गाउँका सबै नागरिकको स्वास्थ्यमा पहुँच पुगोेस् भन्ने उद्धेश्यले गाउँमै बिशेषज्ञ सहितको दुइदिने निःशुल्क स्वास्थ्य शिविर संचालन गरेका हुन ।
शिविरमा स्त्रीरोग, छारेरोग, हाडर्जोनी, नाक कान घाँटी, बालरोग र नसा च्यापिएका लगाएतका ८ प्रकारका रोगहरुको उपचार गरिएको छ । खर्चको अभावमा अस्पताल जान नसकेका लिखु गाउँपालिकाका नागरिकलाइ गाउँमै बिशेषज्ञ डाक्टर र औषधी सहितको सेवा पाएपछि उनीहरुमा खुशी छाएको छ । गाउँमा अस्पताल नहुँदा सामान्य विरामी भएपनि त्यतीकै वस्नु पर्ने वाध्यता थियो । अहिले गाउँमा डाक्टर सहित निःशुल्क सेवा पाउँदा आफुलाई ज्यादै खुशि लागेको लिखु तामाकोशी गाउँपालिका–४ की दिपा महतले बताइन ।
पैसाको अभावमा धेरै वर्षदेखी ढाड र कम्मरको दुखाई सँगै घुडा दुखेर हैरान खेप्दै आएकी फट्याङ्ग्री तामाङ पनि गाउँमा आएको निःशुल्क स्वास्थ्य शिविरले फुरुङ्ग परेकी छिन् । उनी भन्छिन्– पैसा नहुँदा वर्षौैदेखी रोग पालेर बसेको थिए । अहिले गाउँमै जाँच गराउन पाउँदा निकै खुशी छु । समयको पनि बचत भयो, पैसा पनि जोगियो । यस्तै गरि पालिकाले समयसमयमा स्वास्थ्य शिविर राख्न पनि जनप्रतिनिधिसँग आग्रह गर्ने बताइन ।
स्वास्थ्य शिविरमा उपचार लिन आउने गम्भिर प्रकृतीका विरामीलाई थप उपचारको लागि काठमाण्डौं मोडेल अस्पतालसँग सहकार्य गरेर राजधानी पठाउने व्यवस्था मिलाइएको लिखु तामाकोशी गाउँपालिकाका स्वास्थ्य शाखा प्रमुख किशोरी शाहले जानकारी दिए । उनले भने– गम्भिर प्रकृतीका विरामीको हामीले रेकर्ड राखेर उनीहरुको समयसमयमा जानकारी लिने व्यवस्था मिलाएका छौं । जतिसक्दो चाडो उनीहरुलाई थप उपचारको लागि सुविधासम्पन्न अस्पतामा पठाउने तयारीमा लागेका छौं ।
यसअघि पनि पालिकाले तामाकोशी अस्पतालसँग सहकार्य गरेर गाउँमै निःशुुल्क आँखाको परिक्षण गरेको थियो । परिक्षणको क्रममा ८ सय ९ जना विरामीले आँखा परिक्षण गराएका थिए । जसमा आँखाको मोतिया बिन्दु भएका ३६ जना विरामीको निःशुल्क आँखाको शल्यक्रिया समेत भएको थियो । गाउँमा सवै नागरिकहरुले स्वास्थ्य सेवा पुर्याउन पालिकाले आगामी वर्ष पनि स्वास्थ्य घुम्ती शिविर संचालन गर्ने लिखु तामाकोशी गाउँपालिकाका अध्यक्ष केशब महतले जानकारी दिए ।
गाउँबाट विरामी भएर उपचारको लागि शहरका अस्पतामा झर्ने अधिकासं विरामीहरुले डाक्टरलाई रोगको बिषयमा भन्न लजाउने गर्दछन् । डाक्टर गाउँमा नै गएर उपचार गर्दा उनीहरुले आफुलाई लागेको रोगको बिषयमा खुलेर भन्न सक्ने भएकाले पनि ग्रामिण भेगमा बेलाबेलामा स्वास्थ्य शिविर गर्नु जरुरी देखिएको तामाकोशी अस्पतालका डा.सुमन कर्माचार्यले बताए ।
