रामेछाप । रामेछाप नगरपालिकाले नगरको समग्र वस्तुस्थिति समेत झल्कने गरी ‘हाम्रो रामेछाप नगरपालिका’ नामक पाठ्यपुस्तक सार्वजनिक गरेको छ । नगरपालिकाले प्रोफाइल तयार गर्दा लिएको तथ्यांकलाई मुख्य आधार बनाएर समग्र नगरपालिकाको वस्तुस्थिति झल्कने गरी कक्षा १ देखि कक्षा ८ सम्म अध्ययपन गराउने गरी ‘हाम्रो रामेछाप नगरपालिका’ नामक पाठ्यपुस्तक सार्वजनिक गरेको हो । आधारभूत तहको ८ सय पूर्णाङ्क मध्ये सय पूर्णाङ्कको पाठ्यक्रम स्थानीय तहले नै तयार गर्न पाउने प्रावधान अनुसार नगरपालिकाले कक्षा १ देखी ८ को पाठ्क्रममा आधारित पाठ्पुस्तक निर्माण गरेको नगरपालिकाले जनाएको छ ।
अनिवार्य र ऐच्छिक विषय बाहेक सय पूर्णाङ्कको स्थानीय पाठ्यक्रमको विषयवस्तु विद्यालयहरुले पढाउनुपर्नेछ । विहिबार पुस्तकको सार्वजनिक गर्दै नगरप्रमुख नर बहादुर थापामगरले स्थानीयले आफै १०० पूर्णाङ्कको पाठ्यपुस्तक तयार पारेर लागु गर्दा बालबालिकाले आफ्नो गाउँ–ठाउँ, कलासंस्कृति, भेषभुषा, सम्पदा, भावनात्मक सम्बन्ध लगातमा बारेमा जानकारी पाउने र उनिहरुलाई गाउँ ठाँउमै रहने वातावरणको विकास हुनबताएका छन ।
थापामगरले नगर भित्रका विद्यालयहरुमा अध्ययनरत बालबालिकाहरुलाई आफ्नो नगरको समग्र वस्तुस्थिति अध्ययन गर्न सक्ने गरी पुस्तक प्रकाशन गरेकोे बताए । रामेछाप नगरपालिकाको रणनीतिक योजनाको वस्तुगत विवरणको आधारमा तयार पारिएको पाठ्यपुस्तकले विद्यार्थीलाई आफ्नो नगरको विषयमा थप जानकारी लिन सहज हुने नगरप्रमुख मगरको भनाई रहेको छ । नगरपालिकाले समग्र विकासको लागि तय गरेको ‘कृषि, पर्यटन, सडक खानेपानी पूर्वधार, रामेछाप नगर विकासको दिगो आधार’ भन्ने नारालाई पुरा गर्न समेत मद्धत पुग्ने नगर प्रमुखको भनाई रहेको छ ।
पुस्तकमा रामेछाप नगरपालिकाको चिनारी, स्थानीय धार्मिक स्थलहरू, विविध जातजातिहरू, स्थानीय चाडपर्वहरू, स्थानीय भाषाहरु, स्थानीय बाजाहरु, स्थानीय व्यवसाय, स्थानीय खेल, स्थानीय खानेकुराहरु, स्थानीय पर्यटन, स्थानीय स्रोत तथा साधन लगायतका विषयवस्तु समेटिएका छन्  । पहिलो पटक सार्वजनिक गरिएको स्थानीय पाठ्यपुस्तक भएकाले यसलाई कार्यन्वयन गराउन शिक्षक, विद्यार्थी, अभिभावक र सरोकारवालाले महत्वपूर्ण भूमिका खेल्नु पर्ने नगर प्रमुख थापामगरको भनाई रहेको छ । पाठ्यपुस्तकलाई समय अनुसार परिमार्जन गर्न सकिने भएकाले पुस्तकमा आवश्यक अनुसार विषय बस्तु थपघट गर्न सुझाव दिन समेत नगर प्रमुखले अनुरोध गरेका छन ।
शिक्षा शाखाका संयोजक सुकदेव नेपाले नगरपालिकाका सबै विद्यालयका शिक्षक तथा प्रधानाध्यापकहरुलाई स्थनीय विषय पाठ्यक्रम तथा शिक्षण सिकाइएको बारेमा सहजीकरण गरेका थिए ।