रामेछाप । रामेछाप सदरमुकाम मन्थलीमा नेवारी समुदायको मौलिक सांस्कृतिक पहिचान झल्काउने लाखे नाच सुरु भएको छ। नाग पञ्चमीको अवसर पारेर मंगलबारदेखि सुरु भएको यो सांस्कृतिक यात्रा साउन ३१ गते श्रीकृष्ण जन्माष्टमीसम्म विविध जात्रा र परम्परागत नाचगानका साथ सञ्चालन हुने जनाइएको छ।
‘नेवारी कला–संस्कृति पहिचान बचाऔँ, संस्कृति सभ्यता कायम राखौँ’ भन्ने नाराका साथ नेवाः खलः र नेवाः देय दबूँ रामेछापको संयोजनमा आयोजना गरिएको जात्रामा लाखे नाचसँगै लौरो नाच, धिमे नाच, धिन्ताङ, गाईजात्रा, भजन–कीर्तनजस्ता परम्परागत सांस्कृतिक कार्यक्रमहरू प्रस्तुत गरिने छन्।
नेवारी समुदायको बाक्लो बसोबास रहेको मन्थलीमा यस्ता जात्रा र पर्वहरू परम्परागत रूपमा मनाइँदै आए पनि केही समयदेखि रोकिएको थियो। पछिल्लो समय नयाँ पुस्ताको सक्रियतामा यस्ता परम्पराहरू पुनः सुरु भएका छन्। युवाहरूले नै सांस्कृतिक चेतना फैलाउने उद्देश्यले बर्सेनि आयोजना गर्दै आएका यस्ता कार्यक्रमहरूले सांस्कृतिक जागरण ल्याएको स्थानीयको भनाइ छ।
शेखरमान श्रेष्ठका अनुसार, “सांस्कृतिक गतिविधि पुनः सुरु गर्नुको उद्देश्य समुदायमा मौलिकता, आत्मगौरव र सांस्कृतिक उत्तराधिकारको भावना बलियो बनाउनु हो।”
कार्यक्रममा सहभागी स्थानीय युवायुवतीहरू परम्परागत भेषभूषा र बाजागाजासहित झाँकी प्रदर्शन गर्दै नाचगानमा सहभागी भएका छन्। लाखे नाच विशेष आकर्षणका रूपमा रहेको छ, जसमा विशाल मुखुण्डो र नाङ्गा शरीरमा रातो रङ पोतेर प्रदर्शन गरिने यो नाचले धार्मिक, सांस्कृतिक र सामाजिक सन्देश बोकेको आयोजक बताउँछन्।
सांस्कृतिक क्षेत्रका जानकारहरूका अनुसार, यस्ता जात्राले सामाजिक एकता बलियो बनाउनका साथै नयाँ पुस्तालाई आफ्नो मौलिकता र परम्पराबारे अवगत गराउने अवसर पनि प्रदान गर्छ। साथै, सांस्कृतिक कार्यक्रमहरूमार्फत स्थानीय पर्यटन प्रवद्र्धनमा समेत सकारात्मक योगदान पुग्ने अपेक्षा गरिएको छ।
