काठमाडौं । आइतवार देशको पूँजी बजार नेप्से दोहोरो अंकले घट्दै कमजोर बनेको छ। बजार परिसूचक ११.५२ अंकले घटेर २७०८ बिन्दुमा स्थिर रहँदा लगानीकर्तामाझ निराशा थपिएको छ।
बजारमा आज ७९ कम्पनीको शेयर मूल्य बढे पनि १७३ कम्पनीको मूल्य घटेपछि समग्र बजार घटेको हो। यसदिन कुल ४ अर्ब ४० करोड रुपैयाँको मात्र कारोबार भयो, जुन अघिल्ला दिनको तुलनामा उल्लेखनीय रूपमा न्यून हो।
कारोबारमा उतार–चढावसँगै लगानीकर्ताको मनोबल पनि प्रभावित भएको देखिन्छ। बजार विशेषज्ञका अनुसार लगातारको उतार–चढावले छोटो अवधिका लगानीकर्तालाई बढी असर पारेको छ भने दीर्घकालीन दृष्टिकोणमा अझै स्थिरता आवश्यक छ।
यसदिनको कारोबारमा हिमस्टार उर्जा कम्पनी अगाडि रह्यो। कम्पनीको शेयर मूल्य ९.९७ प्रतिशतले वृद्धि हुँदा लगानीकर्ताले उच्च लाभ लिन सफल भए। अर्कोतर्फ, पञ्चकन्यामाई हाइड्रोपावरका लगानीकर्ताले भने सबैभन्दा ठूलो घाटा बेहेर्नुपर्यो। कम्पनीको मूल्य ४.६२ प्रतिशतले घटेपछि लगानीकर्ताले गुमाउनु परेको हो।
बजारमा देखिएको यस्तो उतार–चढावलाई ध्यानमा राख्दै विश्लेषकहरूले दीर्घकालीन रणनीति अपनाउन र उच्च जोखिमपूर्ण क्षेत्रभन्दा सावधानीपूर्वक लगानी गर्न सुझाव दिएका छन्।
