रामेछाप । नेपाली काँग्रेसले रामेछाप जिल्लाका आठ वटै स्थानीय तहमा निर्वाचन परिचालन समिति गठन गरी आगामी निर्वाचनलाई लक्षित गर्दै चुनावी अभियान सुरु गर्ने भएको छ।
आगामी फागुन २१ गते हुने निर्वाचनमा नेपाली काँग्रेसका तर्फबाट उम्मेदवार बनेका काँग्रेस नेता रामचन्द्र खड्कालाई विजयी गराउने उद्देश्यका साथ जिल्ला पार्टी नेतृत्वको निर्देशनअनुसार यी परिचालन समितिहरू गठन गरिएको नेपाली काँग्रेस रामेछापले जनाएको छ।
गठन गरिएका समितिहरूले वडा तहसम्म संगठन विस्तार गर्ने, मतदातासँग प्रत्यक्ष भेटघाट गर्ने, घरदैलो कार्यक्रम सञ्चालन गर्ने तथा पार्टीका नीति, कार्यक्रम र एजेन्डा जनतासमक्ष पु¥याउने काम गर्नेछन्। समितिहरूमा सम्बन्धित स्थानीय तहका नेता–कार्यकर्ता, भातृ संस्थाका प्रतिनिधि तथा स्थानीय सक्रिय कार्यकर्ताहरूलाई समेटिने पार्टीले जनाएको छ।
नेपाली काँग्रेस रामेछापका अनुसार लोकतन्त्रको रक्षा, सुशासन, विकास र जनजीविकासँग सम्बन्धित मुद्दाहरूलाई मुख्य एजेन्डा बनाएर परिचालन समितिले अभियान अघि बढाउनेछ। साथै स्थानीय तहमा रहेका समस्या, जनताको आवश्यकता र विकासका प्राथमिकताका विषयमा प्रत्यक्ष संवाद गर्ने लक्ष्य लिइएको छ।
पार्टी नेतृत्वले संगठनलाई थप सुदृढ बनाउँदै एकताबद्ध रूपमा निर्वाचन अभियानमा होमिन सम्पूर्ण नेता तथा कार्यकर्तालाई आह्वान गरेको छ।
