काठमाडौं । लामो तानातान र आन्तरिक विवादपछि नेपाली कांग्रेस अन्तत ः पुस महिनामै नियमित महाधिवेशन गर्ने निष्कर्षमा पुगेको छ । सभापति शेरबहादुर देउवा सिंगापुर उपचारबाट फर्किएपछि असन्तुष्ट नेताहरूसँग गरिएको निरन्तर छलफलले पार्टीको विवादित महाधिवेशन कार्यतालिका सर्वसम्मत पारित भएको हो ।
सिंगो कार्यसमितिको बैठकले पुस २६ देखि २८ गतेसम्म नियमित महाधिवेशन गर्ने निर्णय गरेको छ । देउवाले संस्थापन र संस्थापनइतर नेताहरूबीच देखिँदै आएको रस्साकस्सीलाई अन्त्य गर्दै सहमतिबाटै कार्यतालिका पारित गर्ने निर्देशन दिएपछि ‘नियमित वा विशेष’ भन्ने विवाद टुंगिएको छ ।
जेनजी आन्दोलन (भदौ २३–२४) पछि महामन्त्रीद्वय गगनकुमार थापा र विश्वप्रकाश शर्माको नेतृत्वमा पार्टीभित्र नियमित महाधिवेशनको माग सशक्त रूपमा उठ्दै आएको थियो । तर संस्थापनपक्षले आगामी फागुनमा हुने प्रतिनिधिसभा उपनिर्वाचनअघि महाधिवेशन गर्न नसकिने दाबी गर्दै विकल्पस्वरूप वैशाखमा गर्ने प्रस्ताव अघि सारेका थिए ।
यता, संस्थापनइतर पक्षले भने विशेष महाधिवेशनका लागि हस्ताक्षर अभियान नै सञ्चालन गर्यो । कांग्रेस विधान अनुसार ४० प्रतिशत प्रतिनिधिले माग गरे तीन महिनाभित्र विशेष महाधिवेशन गर्नुपर्ने प्रावधान अनुसार १४ औँ महाधिवेशनका झन्डै ५५ प्रतिशत प्रतिनिधिले असोज २८ मा केन्द्रीय कार्यालयमा निवेदन दर्ता गरेका थिए । पुस २८ भित्र विशेष महाधिवेशन अनिवार्य गर्ने कानुनी दबाबका कारण पार्टीमा ‘विशेष’ वा ‘नियमित’ दुवै विकल्पलाई लिएर ठूलो द्वन्द्व चलिरहेको थियो ।
विशेष महाधिवेशनले पार्टी विभाजनको खतरा बढाउने भन्दै कार्यबाहक सभापति पुर्ण बहादुर खड्का लगायत नेताहरू सहमतिमै नियमित महाधिवेशन तर्फ जानुपर्नेमा जोड दिँदै आएका थिए । यही क्रममा सिंगापुरबाट फर्केपछि देउवाले असन्तुष्ट नेताहरूसँग पटक–पटक वार्ता गर्दै अन्ततः पुस अन्तिममा नियमित महाधिवेशन गर्न सबैलाई राजी गराएका हुन् ।
कांग्रेस कार्यसमितिको विस्तारित बैठकले दुई महिनाको म्याद थप गर्दै महाधिवेशन तयारीलाई औपचारिक रूपमा अगाडि बढाइसकेको छ । अब पुस २६ देखि २८ सम्म चल्ने यस महाधिवेशनले नेतृत्व, योजना तथा आगामी राजनीतिक रणनीतिका आधार तय गर्ने अपेक्षा गरिएको छ ।
नेपाली कांग्रेसको आन्तरिक द्वन्द्वलाई सहमतिमै समाधान गर्दै नियमित महाधिवेशनतर्फ उन्मुख हुनु पार्टी एकताको दृष्टिले महत्वपूर्ण कदमका रूपमा हेरिएको छ ।