काठमाडौं — नेपालले बालबालिकाको स्वास्थ्यका लागि खतरनाक मानिने रुबेला रोगलाई पूर्ण रूपमा निवारण गर्दै रुबेला–मुक्त राष्ट्रको विश्वव्यापी मान्यता हासिल गरेको छ।
यस ऐतिहासिक उपलब्धिलाई औपचारिक बनाउँदै विश्व स्वास्थ्य संगठन (WHO) र युनिसेफले स्वास्थ्य मन्त्रालयमा आयोजित विशेष समारोहमा स्वास्थ्य तथा जनसंख्या मन्त्री प्रदीप पौडेललाई ‘रुबेला निवारण’को आधिकारिक प्रमाणपत्र हस्तान्तरण गरेका हुन्।
कार्यक्रमलाई सम्बोधन गर्दै मन्त्री पौडेलले यसलाई सम्पूर्ण नेपालीका लागि गौरवको विषय भएको बताए। “यो उपलब्धिलाई दिगो बनाउनु अब हाम्रो चुनौती हो। खोपले रोक्न सकिने अन्य रोगहरूको उन्मूलनतर्फ अब लाग्नुपर्छ,” उनले स्पष्ट पारे।
नेपालका लागि डब्लुएचओका प्रतिनिधि डा. राजेश सम्भाजीराव पान्डवले यो उपलब्धिमा अग्रपंक्तिमा खटिएका स्वास्थ्यकर्मी, विशेषगरी महिला सामुदायिक स्वास्थ्य स्वयंसेविकाको योगदान अविस्मरणीय रहेको उल्लेख गरे।
त्यस्तै, स्वास्थ्य मन्त्रालयका सचिव डा. विकास देवकोटाले अबको मुख्य लक्ष्य दादुरा उन्मूलन रहेको बताए। “दादुरा छिटो फैलिने रोग हो। यसको निगरानी प्रणालीलाई अझ सशक्त बनाउन सक्यौं भने, यो सफलता अन्य रोग नियन्त्रणमा पनि उदाहरण बन्नेछ,” उनले भने।
परिवार कल्याण महाशाखाका निर्देशक डा. विवेककुमार लालका अनुसार दशकौँ लामो प्रयास, उच्च खोप कभरेज, बलियो निगरानी प्रणाली र द्रुत प्रतिकार्य प्रणालीकै कारण नेपालले यो उपलब्धि हात पारेको हो।
