रामेछाप । नेपाल निजामती कर्मचारी युनियनको शनिवार मन्थलीमा सम्पन्न आठौं जिल्ला अधिवेशनले पूनः दामोदर सुबेदीकै अध्यक्षतामा १७ सदस्यीय नयाँ जिल्ला कार्य समिति गठन गरेको छ ।
समितिको उपाध्यक्ष, महिला उपाध्यक्ष र समावेशी उपाध्यक्षमा क्रमशः माधव प्रसाद पौडेल, सुप्रभा कार्की र शिबकुमार महतो रहेका छन् । त्यसैगरी सचिव, सह–सचिव र कोषाध्यक्षमा क्रमशः शेषराज पौडेल, उज्जल बस्नेत र नारायण कार्की निर्विरोध रुपमा निर्वाचित भएका छन् ।
त्यस्तै समितिको सदस्यहरुमा क्रमशः गणेश घिमिरे, कृष्णवहादुर भुजेल, केशव प्रसाद दाहाल, ध्रुवकुमार मगर, शान्तादेवी ढकाल, गंगा थापा, बेखबहादुर खड्का र शिवचन्द्र श्रेष्ठ रहेका छन् । कार्य समितिले थप दुईजना मनोनित गर्न सक्ने अधिकार भएकाले आउने पदाधिकारी बैठकमा दुईजनालाई मनोनित गर्ने जनाइएको छ ।
त्यसैगरी अधिवेशनले केन्द्रीय प्रतिनिधिमा यम बेलबासे, होमवहादुर थापा र घना श्रेष्ठलाई पठाएको छ । नेपाल निजामती कर्मचारी युनियनको आठौं भेलाले सबै पदाधिकारीहरु सर्वसम्मत रुपमा चयन गरेर उदाहरणिय काम गरेर देखाएकाले उक्त पाठ अन्य कर्मचारी संघसंगठनहरुले पनि गर्न सके कर्मचारीमा एकता रहेको सन्देश दिन सकिने निर्वाचन समितिका संयोजक गोबिन्द कटेलले जानकारी दिए ।
नेपाल निजामती कर्मचारी युनियनका केन्द्रीय सदस्य भुपेन्द्र अधिकारीको प्रमुख आतिथ्यता तथा नेपाल निजामती कर्मचारी युनियन रामेछापका जिल्ला अध्यक्ष दामोदर सुबेदीको अध्यक्षतामा उक्त कार्यक्रम भएको थियो । उद्घाटन कार्यक्रममा प्रमुख अतिथि अधिकारीले समय सापेक्ष अनुसार कर्मचारीहरुले देश विकासको क्षेत्रमा उल्लेख्य रुपमा भूमिका खेलेको भन्दै यसलाई बचाई राख्न कर्मचारीहरुमा थप उर्जा र हौसल्ला पाउनुपर्ने धारणा राखेका थिए ।
त्यसैगरी कार्यक्रममा अतिथि नेपाली काँग्रेस रामेछापका सचिव दीपक खड्काले लोकतन्त्र स्थापना गर्ने क्रममा कर्मचारीको पनि अहम भूमिका रहेको भन्दै लोकतन्त्रलाई बचाई राख्न अहिले पनि कर्मचारीहरुले उत्तिकै भूमिका खेल्नुपर्ने समय आएको भन्दै जिल्लामा काम गर्ने क्रममा कुनै समस्या आएको खण्डमा पार्टीलाई जानकारी गराउन पनि सचिव खड्काले कर्मचारीहरुलाई आग्रह गरे । उनले भने– कर्मचारीलाई परेको समस्याको हल गर्न पार्टी क्रियासिल भएर लाग्ने छ ।
त्यस्तै उद्घाटन कार्यक्रममा नेपाल पत्रकार महासंघ रामेछापका पूर्व सभापति हिमाल ढुंगेल, नेपाल निजामती कर्मचारी युनियनका पूर्व जिल्ला अध्यक्ष उद्धवप्रसाद घिमिरे, कर्मचारी युनियनका प्रतिनिधि यमलाल बेलबासे, नेपाल निजामती कर्मचारी युनियनका पूर्व केन्द्रीय सदस्य होमवहादुर थापा र स्थानिय तह कर्मचारी युनियनकी जिल्ला अध्यक्ष घना श्रेष्ठले आ–आफ्नो धारणा राखेका थिए ।
