रामेछाप । छिमेकी जिल्ला काभ्रेको चौरीदेउराली गाउँपालिका वडा नं–५ मा नेकपाका केन्द्रीय नेता चढेको गाडी गएराती तोडफोड गरि आगजनीको समेत प्रयास गरिएको छ ।
चौरीदेउराली गाउँपालिकाको ५ नम्वर वडा कमिटी विस्तार गर्न आइतवार साँझ नेकपाका जिल्ला सदस्य शिव गौतमको घर नजिकै पार्किङ्ग गर्न लाग्दा बा १५ च ७८२१ नम्वरको गाडी राती १०ः३० वजेको समयमा तोडफोड गरिएको हो । गाडी पाकिङ्ग गरिराखेको ठाउँमा करिव एकदर्जन मोटरसाइकलमा आएका समूहले गाडी तोडफोड गरेका थिए ।
गाडीमा तोडफोड पछि केही युवाहरुले पेट्रोल झिक आगो लगाउनुपर्छ भन्दै सोही गाडीवाट पेट्रोल निकाल्न खोज्दा नेता र स्थानीयबासी प्रतिकारमा उत्रन थालेपछि युवा समुहको टोली उक्त ठाउँवाट भागेको नेता शिब गौतमले जानकारी दिए । उनले भने– आइतबार चौरीदेउरालीकै धुसेनीमा कार्यक्रम सकेर केन्द्रीय नेताहरु मेरो घरमा बाँस वस्नु भएको थियो ।
सदस्य गौतमको घरमा नेकपाका केन्द्रीय सदस्यत्रय चूडामणि गौतम, रीता ढकाल र प्रकाश गौतम तथा जिल्ला नेता लेखराज गौतम, इन्द्रबहादुर तामाङ लगाएतका १६ जनाको टोली बास बसेका थिए । चौरीदेउरालीमा कुनै पनि कार्यक्रम नगर्न प्रचण्ड–माघब नेपाल समुहका नेता कार्यकर्ताहरुले धम्की दिदै आएका थिए ।
पूर्वमन्त्री एवं नेकपाका केन्द्रीय सदस्य गोकुल बाँस्कोटाले आफ्ना पार्टीका नेता तथा कार्यकर्ताहरु रातीको सयमा बास बसेको ठाउँमा आएर छापामार शैलिमा आक्रमण भएकाले आक्रमणकारीलाई तत्काल समाती कानूनी दायरामा ल्याउन सम्वन्धीत निकायलाई आग्रह गरेका छन् । उनले पार्टीको जनमत घटेपछि प्रचण्ड–माधब समुहका कार्यकर्ताहरुले यस्तो जङ्गली हर्कत गरेपनि यो सफल नहुने बताए ।
प्रचण्ड–माधब समुहका नेता तथा कार्यकर्ताहरुले कोशीपूर्वस्थित उक्त गाउँपालिकाका संङ्गठन विस्तार गरिरहदा केही हप्ता देखी नै कुनै पनि कार्यक्रम नगर्न धम्की दिदै आएका थिए । उनीहरुले गाउँपालिकाको कात्तिकेदेउराली र विर्ता देउरालीमा कार्यक्रम गरे आक्रमण हुने धम्की समेत दिदै आएको युवा सङ्घका जिल्ला संयोजक विक्रम चौलागाईले जानकारी दिए ।
घटनाको बिषयमा अनुसन्धान भइरहेको र घटनामा संलग्नलाई पक्राउ गरि आवश्यक कारवाहीको दायरामा ल्याइने इलाका प्रहरी कार्यायका प्रमुख पवनकुमार झाले जानकारी दिए ।
