काठमाडौँ । नेकपा एमालेको जारी वाग्मती प्रदेशको अधिवेशनमा नेतृत्व चयनको लागि आज मतदान सुरु भएको छ । सहमतिको लामो कसरत पछि आज ढिला गरी मतदान सुरु भएको छ । नेतृत्व चयनको लागि केही बेर अघिबाट पार्टी केन्द्रीय कार्यालय च्यासलमा मतदान सुरु भएको हो । असोज ८ गते उद्घाटन भएको अधिवेशनको ९ गते नेतृत्व चयनको कार्यक्रम राखिएको भए पनि सहमतिको प्रयास लम्बिँदै जाँदा आज ढिला गरी मतदान भएको हो ।
वाग्मती प्रदेशको अध्यक्षका लागि केन्द्रीय सदस्य कैलाश ढुङ्गेल र कृष्णप्रसाद दाहाल प्रतिस्पर्धामा छन् । अध्यक्षका लागि निवर्तमान अध्यक्ष केशव पाण्डे, बागमती प्रदेशका पूर्व सभामुख सानुकुमार श्रेष्ठ र रामेछापका केशरबहादुर बुढाथोकीले पनि उम्मेदवारी दिएका थिए उनीहरूले भने सहमतिको लागि उम्मेदवारी फिर्ता लिएका छन् ।
उपाध्यक्षको एक पदका लागि ईश्वरचन्द्र पोखरेल, दावा दोर्जे लामा, नारायणप्रसाद खतिवडा र राजेन्द्र राजथला बिच प्रतिस्पर्धा हुने भएको छ भने सचिवका लागि नवराज सिलवाल र हस्तबहादुर पण्डित बिच चुनाव हुने भएको छ । उपसचिव खुल्लामा ९ जना बिच प्रतिस्पर्धा हुने भएको छ भने महिलामा दुई जना बिच प्रतिस्पर्धा हुने भएको छ ।
